1 Mo"so wa jhaung zug: mo" ngaid: ra". Byumyu" qe gyaug: nin" na geshao:. Kher- ubim: dao mae zaung: ab' na: ra". Mug: myid wa laui" nain" na shao:.2 Mo"so wa Ziun: bam mae qi" thao" yaug ngaid: ra". Byumyu" cao jab tho' mae je: myhao: ra".3 Qi" qhang mung: gyaug pho: ngaid: ra" mang khyao: re caung: khin" geshao:. Khoru: ein: re yao" mang khyao: wa shao lho" ra".4 Dang main" rure o ngaui: ra" Mo"so re caung: khin" ge,. AsAng jo main: ra" tarha" qao: tae to" to: va" ra". Yaku' amyu" mae tarha" ra" khyo" kaid' mung: din" ra" dao: phyid' ra".5 Ngonhaung" AsAng Mo"so re nga: yhe' ge, wo". Khyid nao: jao: agyid' mae goe; gam" pa" ge,. Khoru: ein: re AsAng wa shao lho" ra".6 Khin jaung Moshe we' Arun: , yao" mang khyao: re mho' yao: ra" Samuela , ce bam wa Mo"so re mho' yao ko" mung: AsAng wa dao: tau: byid' ra".7 Yao: bam re jham thaui: khug mae" dao: jhau: ra". Yao: bam re: yao" sagso: dao: we' khyo" byid' to" ra" cao" khyao jham re cao" ko" ra".8 Ngonhaung" AsAng Mo"so we" nao yao: bam re dao: tau: byid' ra". Yao: bam: qobo re khyaid' byid' ra" Mo"so ngaid qere: yao: bam: lo, mau" zo" we' daru: za: loge, dam: phaug' ra" Mo"so ngaid: ra".9 Ngonhaung" AsAng re nga: yhe' na ge, shao lho" ra" bam dao mae goe; gam" pa" caung" na ge, khoru: ein: re ngonhaung" AsAng Mo"so wa shao gyang" ra" wo".