1 Mo"so wa jhaung zug: ngaid: ra". Myidkin wa ngaui bau: mung: gogyo: kao" jham re: ngaui bau: zhao: yao: geshao:.2 Jham thaui: we' mug: caid' wa Mo"so: lhang" gam: mae jo; ra". Dang main: taung" dao: phyid' ru we' tarha" khyo" tau" phyid' ru wa, yao" lakin: qao: tae ngaid: ra".3 Myi: wa yao" qhid' kheim: mae su" lhau mung: yao" gyevo qe re nga" pye' ra".4 Yao" lhe' caid' yang myidkin re bao byid' ra". Myid gaung wa ai re myao mung: laui" nain" nin" na: ra".5 Myid dagye; geim" re ug: ra" Mo"so: qhid' kheim: mae bam jham wa byo: min" re" ru: aqang: boe" byaug: ra".6 Dang main" ra" akhyo re mug: gaung wa de: de: qhu" byid: mung: byu alhab' mo, wa phung qab bao re the' myao ko" ra".7 Sulho alho re goe; pa" ra" mo, aseim akeim ngaid: ra" ja: mae ngaid beim" ra" mo, alhab' wa qho' phau: geshao: mo"so alhab' geim" mo, we" Mo"so re phug' myao: goe; pa" ge, wo".8 Mo"so we" AsAng: tarha" dao" mathao mae Ziun: the' gyo: mung: ngaui bau" na: ra". Yuda zomyi: zo: qe re: ngaui bau: ngaui lho" zag: yao: na ko" ra".9 Khoru: ein: re Mo"so we" nao AsAng wa mug: myid dao mae myhao: thao" yaug ngaid: ra". mo"so alhab' geim" adao mae gyai yao: nga: yhe' byid: gai: ra".10 Mo"so re jhid' kao: ra" mo, we" magai: ra" mau" re to" pye' ge, Yao: re lam khug lam" jang" ra" mo; kao so' solo gug: gam byid: mung: tarha" macao" ra" mo; lo, mae" re: khyaid' khyi: yu: ra".11 Bo" bao wa dang main" ra" yaug: tau: , ngaui bau" ru wa nhag' lam: din: yaug: tau: myug: shi: boe" ra".12 Dang main" ra" mo, we" Mo"so mae khug ngha mung: ngaui bau: ge,, shao gyang" ra" jo, qo re caung: khin" ge, wo".