1 Mo"so we" nga" jhaung: mho' thoe re tae" gyo: byid: la, ngo mho' yao thoe AsAng jhao" joe" vao veshao: wo".2 Qug: khai: qhug' ra" au: ngo re maqu" mageim dakaid' la, Ngo yao: ke' au: tae" gyo: byid: la, phyaid za: tau: byid: la,.3 Nga" ayo, ba na jham wa myi: khug' thaui: ru: baui" lo" na: ra". Nga" shoqug: shoqae jham re: myi: mhab' ru: nga" jeim" lo" na: ra".4 Nga" nhag' myid wa the' zao" tin: mung: jhoe' ra" mhin: re" ru: kyaug' lo" na va". Zo zo: nae" lao" re: to" myhid' pye' ra".5 Abang mabyid kaug' ngug: na mung: shoqug: mae shoqid za: alham: lo".6 Ngo wa gao so yo mae" zeim kho" no, we' din" yo mae" khaung: bab: ru:ngaid: byaug va".7 Ngo maqo" yab: myhid' mung: khaung dao mae" ngho' te: zo: ru"ru ngaid: byaug va".8 Nga" gyevo qe wa ne, geim" ngo re jung" khyoe' na ko" ra". Ngo re manug nhung: ra" mo, wa ngo re nhang: kheim: ke' na: ako".9 Myiqe, re zo" re"ru: zo: mung: nga" shaug' keim mae re: ngug byid we' lhag' byaug va".10 Ai wa ni" nhag' yo" ru we' nhag' lam: laung: ra" mathao: yang ngaid: ra". AsAng wa ngo re tau: yhe' mung: dam: deim" khyo" ke' ra".11 Nga" ba na ayo, jham wa byaug: lo" ra" bao qaung re"ru: ngaid mung: vohau: re" ru: jhoe' kyaug' lo" na: ra".12 Mo"so we" AsAng wa getam: teto mae" na: na mung: ni" mang khyao: wa data mae" data agang" tang: jo; ra".13 To" li" wa, Ziun: re nhag' myain" yu nae" ayo, ngaid va". Yao: re qu" gam caung nae" ayo, joe" va".Yao: we' dang: to" ayo, joe" va" ra".14 AsAng: daui mung mo, ai: laug baui jham re phug' te' ako". Yao" phaui: lhug rere: o ngaui: ako".15 Alao" byumyu" qe wa Mo"so: mang khyao: re myidkin: jhaung zug: qe wa ni" mang khyao: re gyaug phug' li" genae".16 Mo"so wa Ziun: re vai" to: mung: phung bao ham" hung: qi" ra".17 Myaung sho: mo; jhaung: mho' thoe re tae" gyo: byid' na mung: yao: bam mho' yao thoe re xam" to: byid' ra".18 AsAng kaid' ra" mau" zo" jham: akhyo re xam" to: ge, ai lao" za: thao: bang: mae na: li" nae" mo, wa yao: re caung: khin" li" genae".19 Yao: wa myhao: thao" ra" shaogyang" jo, qo mae" zhaug' qu" na: ra". Mug: gaung mae" myid gaung khyo qu" ke' ra".20 Kyam: laung" ra" mo, gyi: ngug thoe re yao: the' gyo" na mung: shid: lo" na va" mo; tau: kham: phung" byid' ra".21 Airu: mung: yao" mang khyao: re Ziun: mae hau" nhao" na mung: Yerusalem: mae re: caung: khin" li" genae".22 Ai: au: mae amang: mang: adin" din" mae" byumyu" qe wa yao: re goe; pa" caung: nae" tau: ham phaung: lo: li" genae".23 Yao: wa khyo le; mae nga" qam: o: re yeim: khyo" pye' byid: mung: nga" bana ayo, re qhaung" ke' byid' ra".24 Alao" ngo mho: ru wa Mo"so we" nga" kao bain: ve,qae" angaid: shi" re daqab: pye' byid: la,. Ni" zinna jham wa daqae: mae" daqae: mae agang" tang: jo, ra".25 AsAng wa geco' getoe: mae" myidkin re phain: to: mung: mug: nyug lasung" wa ni" lo, mau" zo" ngaid: ra".26 Ai jham byo, qeim: baui" lo" ngaid qere: AsAng wa gyag maqui: ngaid: ra". Ai jham wa mai bau: xug' khye' re"ru: qeim" zae" lo" li" genae". AsAng wa ai jham re mai bau: axug' re"ru: tha" pye' mung: ai: gu: wa lai: lo" byaug: li" genae".27 AsAng kam" wa malam: lai: na: na mung: ni" zin na jham re: gain: thao" lo" ga" ru majo, ngaid: ra".28 AsAng: mau" vin mo, zo: myid: qe wa na: tang mung: amyu" aboe: jham re: AsAng: qhid' kheim: mae na tang ye, tang: na genae" ngaid: ra".