1 Mo"so re nghaui" caung: thoe asag' we' caung: nghaui" ge, myidkin: byu qe AsAng re nghaui" caung: ge,.2 Mo"so re nghaui" caung: thoe we' caung: ge, yao" mang re nga: yhe' ge,3 Yao" phung bao re getau: byumyu" qe mae mug' pho" mang re byumyu" alhab' geim" mae re: ta" hau" kyo: ge,.4 Mo"so wa qi" qhang: thao" ngaid mung: caung: khin" gai: ra". Mo"so so mae" so tho' mae gyaug pho: ngaid: ra"..5 Getau: amyu" mo"so alhab' wa aseim akeim za: ngaid ko" ra". Mo"so kam" wa mug: gaung re phain: to: va" ra".6 Phungbao qam: o: wa yao: mae ngaid: ra". Kheim: so' qam: o: we' ham" hung: wa shao lho" ra" jo, qo mae ye; jo; ra".7 Byumyu" cao jab qe we" Mo"so wa phungbao we' qam: o: bo: ra" ein: yhin" yu ge,.8 Mo"so: mang khyao: wa kheim: so' qi" ra" ein: yhin" yu ge,. Caung da" jhaung qhu" xeim: re ci mung: yao" vang" khug khyo vao ge,.9 Shao lho" za: shaung: ci mung: Mo"so re goe; pa" ge,. Myidkin byu alhab' yao" qhid' kheim: gyaug: nin" na ge,.10 Mo"so wa jhaung zug: ngaid: ra" ein: su pe" amyu" re ta" kyo: ge,. Mug: myid qao: tae wa malam: lai: gang" tang: jo; li" nae".Byu qere dang main" ra" khyo" tarha" dao: phyid' li" nae".11 Mo"so: qhid' kheim: mae mug: gaung wa ngaui bau: shao:. Myidgaung re: zhao: yao: ru jo; na shao:. Qid dae we' ai: mae na: ra" gu: re: thoe mo" we' myang: hau: na geshao:.12 Din" yo we' din" yo mae na: gu: , jo; gu: ngaui bau: geshao:. Alao" yoqao" yo mae" sag' gae vobao jham re: Mo"so re zhao: yao taung" nghaui"caung" li" genae".13 Khoru: ein: re AsAng wa gyo" li" va". Myidkin: byu qe re tarha" dao: phyid' nae" tau: gyo" li" va". Mug: myid xaosu byu qere dang main" ra" tarha" we' re: byu qere dao: so: we' re: dao: phyid' byid' li" nae".