1 Qobo byid: nae" sang: ra" Mo"so , qobo dae qo" byid' ra" Mo"so bao qhi: na shao:.2 Mug: myid byu qe re tarha" dao: phyid' ra" Mo"so we" to" li" wa,. Ngaid beim: nghao" ra" mo, re main: qi" ra" qobo dae byid: wa,.3 Mo"so we" tarha" macao" ra" mo, wa khomyhao" myao" sho' ngaui bau" na: li" genae" laug i"?.4 Makhyang: mashab: rure kaid' ra" mo, khyoe' mung: dao: thin jhau zo" re" khomyhao" joe" sho' bau" nghao" na genae" laug i"?.5 Mo"so we" yao: bam wa AsAng: byu qe re khang" nau: mung: khyao kham khyao khae: re yhin" pyam" veko" ra".6 Cug' mo" qe we' byubang" qere re: cug' zo: nau" qere re: se' ko" ra".7 Ngaid qere: Mo"so mathe' myao , Yaku' amyu" Mo"so wa mabeim: ngaid: ra" ga: mho: ko" ra".8 Gug' nyhug' nhag' myid bo: ra" mo, we" ba: gyo: ge,. Byu qeim qe we" khomy- hao" she, juyi ba: yu genae" i"?.9 No: khye' te' yaug wa mathe' gyo: zai i"?. Myo, jid' re phain: ra" yaug wa mamyao zai i"?.10 Byumyu" cao jab re mho" shid' ra" yaug wa qobo magai: byid: i"?. Byu jham re juyi mho" byid' ra" yaug wa yao: yao: juyi maba yaug i"?.11 Byu xaosu: tau" da wa aseim ngaid: rure Mo"so ba: ra".12 Mo"so we" nao ta" peim: mung: ni" tarha" re mho" shid' ra" yaug wa nga: lho" ra".13 Tarha" macao" ra" mo; tau: mang: khung: bin: dau: sho' qug: khai" ra" ba na mae" yao: loe, veshao:. Nao yao: re dug no: jo, qo ceim" shid' byid: wa,.14 Mo"so wa yao" amyu" re maha: pye' , yao" khyao kham khyao khae: re shepye' to: nae" ru mangaid:.15 Dang main" ru mae tarha" dao: phyid' mung: nhag' lam: din" ra" mo, alhab' wa ai: thao cao" li" genae".16 Makhyang" ra" mo, re tam" pye' mung: ngo we' khoyaug to" ye, nae" i"?. Tarha" macao" ra" mo, re tam" kyo" pye' mung: nga" shaid' mae khag' boye, genae" i"?.17 Mo"so wa ngo re maba: bao" ngaid: re nga" solo wa cae: jhug tag: jo, qo mae na: nae" ngaid: ra".18 Ngo wa nga" khyid zab: jhaid' na: ein: mho: ra" au: Mo"so we" ni" jeju ngo re thaug' qhao" yu va" ra".19 Nga" nhag' lam: aung khug myid myo: myid laug: na: au: mae nao gug: gam byid: yang: nga" nhag' myid re ngaui bau: nhao va".20 Tarha" atha" makhyang" ra" khyo" to" to" ra" la kin wa AsAng we' khoru: gai: te' zam" nae" i"?.21 Dang main" ra" yaug re se' nae" tau: ham phaung ko" ra". Qobo maqo" yaug re shaid' shao: ga: dao: phyid' ko" ra".22 Ngaid qere: Mo"so wa nga" zho: cang vang , ngo khug ngha jao: laung: mo" baui ngaid: ra".23 Yao: bam: qobo re yao: bam: adao mae dam: tug' byid: nae" ngaid: ra". Ngo nhaung" AsAng Mo"so wa yao: bam re zai" kain" jheim" pye' li" nae".