1 Mo"so: nhag' myain" jeju re ngo khon- hae" re: nghaui" thoe caung: nghaui" na nae". AsAng: dao: so: re byu ngug xe qae: ta" hau" kyo" na nae".2 Ni" nhag' myain" jeju wa gang" tang: ra". Dao: so: re mug: gaung mae malam: lai: gang" tang: jo; ra" ru re ngo nhag' dag: ra".3 AsAng mho: ru wa ni" amyu" aboe: re khonhae" re: na tang nhao nae".4 Ni" lakin rere: byumyu" aqae: qae: mae gang" tang: jo, nhao nae" ein: ngo khyin: yu: ra" yaug we' ngo dao: thang" to: mung: nga" jeim Davi re jham kai" ru kaid' va".5 Mo"so we" mug: gaung wa mug' pho" mau" re re: , shao lho" ra" mo, ham: phaung zo" re" dao: so rere: caung: khin" geshao: wo".6 Khoru: ein: re mug: gaung mae Mo"so we' khoyaug qo" mai qhi" genae" i"?. Mo"so: zo: qe mae Mo"so we' khoyaug dau nyang" nae" i"?.7 Mo"so wa shao lho" ra" mo; volo phaung mae gyai gyaug pho: ngaid: ra". Yao" lhang" gam: mae na: ra" mo, alhab' phug' myao: qo ngaid: ra".8 Gug: mang: dae gam ug: Mo"so we" nao re" ru: qam: mo" bo: ru wa khoyaug ngaid: ra" i"?. Ni" dang main" dao: so: wa nao re lhang" kham" to" ra".9 Qid dae mo" myang: hau: rure ug: ra". Bang: lhung" to" li" rure qo" tam" pye' ra".10 AsAng wa sulhe: re" ru Rahab' re khyug' khyo" mung: qam: mo" bo: ra" lo, lam" yang gyevo jham re khyi" khao: ngo" khyo pyo: sin" ke' ra".11 Mug: gaung we' myid gaung wa Mo"so mae" ngaid: ra".12 Qid meim qid bang: re nao phain: to: va" ra". Ta:bo: bam we' Hermon bam wa ni" mang khyao: mae ngaui bau" na ko" ra".13 Ni" lo, pau" wa lau: gai: lo, pau" ngaid: ra". Ni" lo, wa qam: bo: ra". Ni" lo, yo lo, tau: to' to: va" ra".14 Dang main" ru we' tarha" dao: phyid' ru wa ni" lakin qao: tae ngaid: ra". Jeju we' dao: so: ni" qhid' kheim: mae lao" na: ra".15 Labo" maid thoe re ba: gyo" ra" amyu" wa nga: lho" ra". Mo"so we" ni" myo, nho bo" bao mae yao: bam qo" su" qin" ko" ra".16 Ni" mang khyao: mae yao: bam ngaui bau: zhao: yao: na mung: ni" dang main" ru mae nga: yhe' ru qhug' ko" ra".17 AsAng wa yao: bam: qam: o: phung ngaid: ra". Jeju khyo" yang yao: bam: khyug re tau: yhe' byid' na: ra".18 Mo"so wa ngonhaung" re gug: gam: go ngaid: ra". Israel amyu" shaogyang" ra" Mo"so wa ngonhaung" jhaung zug: ngaid: ra".19 Dalhang re" lamyhung" mae nao ta" to: mung: lam jang" ra" mo, re nao mho: ru wa qam: bo: ra" sulhe: re ngo bao" thaug' nae" volo phaung mae zolau: dayaug re ngo tau: to' to: va".20 Nga" jeim Davi re the' myao mung: shao gyang" ra" xau we' yao: re gyain: byid: va".21 Nga" lo, wa yao: we' daga" na: na mung: nga" lo, lam" yang yao: re zaui" zag: ci nae".22 Gyevo wa yao" jo, nho" re maqo" lhaid' yu nae". Tarha" macao" ra" yaug wa yao: re maqo" yhin" pyam" lo: nae".23 Yao" gyevo jham re yao" myo, qhao: tae yhin" mung: yao: re manug nhung: ra" mo, re qobo dae byid: nae".24 Nga" jeju we' dao: so: wa yao: mae na: jo, mung: nga" mang khyao: khyo" yang yao" khyug re tau: yhe' ru qhug' li" nae".25 Yao" lo, re re: qid dae dao mae re: yao" lo, yo lo, wa qid gyaung: dao mae ngo kai" to: nae".26 Yao: re: AsAng wa nga" pho" nga" Mo"so: , ngo re khyaid' yu: ra" laung: mo" baui ngaid: ra" ga: ngo re khai: li" nae".27 Ngo re: yao: re zo: qhid' jo, qo mae nha mung: myidkin: jhaung zug: qe tho' mae qi" thao" yaug poe" nae".28 Nga" jeju wa yao" dao mae khonhae" re: ajo; jo, mung: nga" dao: so: re: yao: mae" gao" lin: lo" nae" mangaid:.29 Yao" amyu" aboe: jham re: malam: lai: na: tang ye; tang nhao nae". Yao" lakin re: mug: gaung: bo" bao ru: gang" tang: jo; li" nae".30 Yao" zo: myid: qe nga" tarha" shepye' mung: ngo to" to" ra" cao" khyao jinkham re macao" pyang".31 Nga" cao" khyao jham re khyoe' mung: nga" khang" dao: jham re macao" lo: na ko" ngaid: re ,32 Ngo yao: bam: qobo re vo: se" yang yao: bam shaid' nghung" rure be, mung: qobo dae byid: nae".33 Ngaid qere: nga" jeju wa yao: mae" qab: yu nae" mangaid:. Nga" dao: so: rere: phyo' pye' nae" mangaid:.34 Nga" dao: thang" rere: makhyoe' jheim: nae". Nga" nhaid' dao: thoe rere: qab: yu lo: nae" mangaid:.35 Ngo wa Davi re mamhug' mavhain" nae" ein: nga" shao lho" ru mae lao: yang: jham tang: va".36 Yao" amyu" aboe: wa byungug xe qae: na: tang: li" genae". Yao" lakin re: nga" qhid' kheim: mae ba ru zho: na: li" nae".37 Lho" mo" re"ru: mug: gaung mae dao: so: zaung: ra" sagso: re"ru: gang" tang: jo, shao: ga: AsAng mho: to: va" ra".38 Ngaid qere: AsAng wa ana" shepye' to: mung: qu" ca' pye' ra". AsAng mae xau gyain: khae: yu: ra" yaug re nhag' yo" ava".39 AsAng we' to" ra" dao: so: re phyo' mung: yao" lhugmaug re myid gaung joe" sho' khyaid' khyo" ke' va" ra".40 Yao" kho' qae jham re nao phyo' pye' mung: yao" vokham" rere: azau: akhyain" kaid' pye' ra".41 Khyo mae su" lai: lo" mo, yao: re phyo' yu ko" mung: yham kyo: cao: qe mae qho' pho: jo, qo boe" nhao: ra".42 Yao" gyevo qe: lo, yo lo, re tau: to' mung: gye kaid' mo, alhab' re ngaui bau: nhao: ra".43 Yao" shae su: re nai: lham: byid: mung: mang: khaid' ru mae yao: re mabao" thaug' ngaid: ra".44 Yao" phung bao re go: kyo" pye' mung: yao" lakin re myidgaung khyo khyo" ke' byid' ava".45 Yao" ve, qae" ayo, re alang" zo: to: byid: mung: qho' phyo' byid' ava".46 Mo"so we" nao khomyhao" joe" sho' vho' na shi: nae" i"?. Ni" nhag' yo" gyid' ru wa myi: ru: ade; na shi: nae" i"?.47 Nga" kao khoqhi" lang" ru re beim: so: wa, pe" ru: xaosu kao re phain" nha: to" i"? ein: ru beim: byid: la,.48 Shid: ru maqhug' kao daui: na mung: yao: yao" solo re movo: mug: kheim: so' mae" qo" lhoe' yu: ru khoyaug ngaid: ra" i"?.49 Mo"so we" dao: so: we' daga" AsAng: jeim Davi mae jham kai" to" ra" geco' ne; jeju wa khai: mae ngaid: byaug: laug i"?.50 Mo"so we" AsAng: jeim qe phau" ra" jung" khyoe' ko" rure myid: beim: byid: la,. Nga" tao: kheim" mae byumyu" myo: sho' mo; jung" khyoe' dao: re ngo vo; ci: na va".51 Mo"so we" AsAng: gyevo jham jung" khyoe' ba: ako". AsAng mae xau gyain: khae: yu: ra" yaug: khu xam re jung" khyoe' ko" ra".52 Mo"so wa mug: myid aqae: aqae: ata ta mae nga: lho" na veshao: wo". Amen we' Amen.