1 Ngo re khyaid' khyi: yu: ra" Mo"so we" myi" na" ngo nao re mho' yao: na: wo".2 Ngo mho' ra" kheim: Nao jhao" kyao" veshao:. Ngo mho' yao thoe re tae" gyo: byid: la,.3 Nga" nhag' myid aqug: aqae" phau" na mung: nga" kao so' wa movo: mug: we' jhao" lo" na va".4 Ngo wa mang: khung: khyo vao lo" ra" mo, we' dau: byaug mung: qam: gain yaug ru: boe" na va".5 Nao khonhae" re: madam: myid: beim" ra" su shid mao gaung jham mae shepye' to" ra" yaug se' mung: labbug mang: khung: mae lang" jhao" jo, ko" mo, mae ngo bobo: na: wo". Ni" lo; yang mabao" thaug' ra" mo, ru: boe" na va".6 Ngo re no; thao" ra" myid sao: dung: mug: caid' ru nghoe' gam mung: no; thao" ra" jo, qo mae khyo" lhaung" to: va" ra".7 Ni" nhag' lam: laung: ru wa ngo re nhai" zag: to" ra". Ni" qid bang: lhung" alhab' yang ngo re deim" zag: to: veko".8 Nga" ba nam sang: cao: qe we' va" lin nhao mung: yao: bam: ca' gyaug jo, qo ngo re boe" nhao va" ra". Ngo wa kham" lhaung" to" ru qhug' mung: taung gaung khyo magai: thug' lo: ,9 Qug: khai" ra" mathao mae nga" myo, thab thab mung: lo" byaug va". Mo"so we" ne, qug ngo nao re yao: na va". Nga" lo, ni" qhid' kheim: khyo tau: qang: na: wo".10 Shid va" mo, re mug' pho" mau" ci: qhu" nae" i"?. Nyhab' to: mo; alo jham to" li" mung: nao re caung: khin" li" genae".11 Lab khug mae ni" jeju we' myimai: tham: mae ni" dao: so: re ta" kyo" li" nae" i"?.12 Mug: caid' jo; ra" jo, qo mae ni" mug' pho: mau" we' byo; qeim: ra" mang: mae ni" dang main" rure yao: bam ba: gyo: genae" i"?.13 Mo"so we" AsAng re mho' yao: na: wo". Ne, seim mae ngo mho' yao thoe wa ni" qhid' kheim: mae joe" va".14 Mo"so we" AsAng wa pe" mung: nga" nhag' myid solo re shepye' to" i"?. Ni" myo, khung: ngo mae" pe" ein: lhang: phaug' lo" i"?.15 Ngo wa qug: khai: phau: yang: shaid' lo" na: kyi: va". AsAng byid' ra" dae no re ngai shi" yo, mae" thaung" qhug' lo yang: nhag' lam: thao" kyi: va".16 Ni" nhag' lam: yo" laung: ru nga" dao mae joe" yang: ni" gyaug pho: mau" yang ngo re phyo' qheim" va" ra".17 Ai: ru wa qid re" ru: ngo re lhang" gam: to: ko" mung: ngo re gam: sho' kham" to: veko".18 Ngo re jhid' de; ra" yaug we' ba nam re ngo we' va" lin nhao va" ra". Ngo we' jho" ba jho" se" ra" mo, wa mug: caid' khug mae na: bam ko" ra".