1 Mo"so we" AsAng wa geco' ne, mae" ngo nhaung" khug ngha jao: ngaid: ra".2 Bam jham re matau: yhe' , myid gaung we' mug: myid jo, qao: re maphain: shi: mae" AsAng wa getam: geto mae" mug: khothao" myid khothao" Mo"so ngaid: ra".3 Byu qe re kam" wa phaui: lhug bam khyo dam: nhao: ke' mung: xaosu byu qe lo" gese, ga: mho: ra".4 Ni" qhid' kheim: mae zin lam: dataung wa aye: ne, lai: lo" va" ba na we' myi" ayo, ru: ngaid: ra".5 Nao yao: bam re myhung: ke' mung: yao: bam wa yab pyo" ruru: boe" ko" ra".6 Yao: bam ne, seim mae" vohau: re" ru: yaug: li" mung:- Ne, seim mae wa bu" yaung" byo: li" mung: myi" thao mae yaid: pye' mung: jhoe' lo" ko" ra".7 Ni" nhag' jam: yo" ru yang ngonhaung" qeim" gyoe; gyo" mung: ni" nhag' lam: yo" laung: ru: yang gyaug: nin" ru qhug' bam va".8 Ngonhaung" yug: no re ni" qhid' kheim: mae re: mabeim: maso" qobo jham re ni" myo, qao: mae nyham" to" gu: re: bo" bao mae phung" qhu" to" ava".9 Ni" nhag' yo" gyid' ru: yang ngon- haung" ba na ayo, lai: lo" byaug va". Ngon- haung" zin ve; jham wa aqug: aqae" we' na: lhai: ke' ra".10 Ngonhaung" kao wa nhaid' xe zin ngaid: ra". Qao" zin" qam: o: gai: ra" mo, she' xe zin qo" joe" ngaid qere: ngaid beim: bau" nghao" ru wa myaung: dug: ru we' kaug' qhui: ru za: ngaid: ra". Ai: ru wa phyaid za: lai: lo" mung: ngonhaung" wa baui" lo" byaug: ra".11 Ni" nhag' jam: yo" ru we' gyaug gai: ra" mau" re khag' qo" the' ba byid: nae" ngaid: ra" i"?.12 Ngonhaung" myid nyain: juyi re nhag' kao" mae qo" ke' yu sho' ngo nhaung" yao: yao" ba na ayo, re qo" qug nae"tau: mae mho" shid' la,.13 Mo"so we" dam: li" lo wa, , khomyhao" myao" nae" i"?. Ni" byu qe: tau: nhag' lam: damyid: qug' no: na.14 Ngonhaung" re jeju we' phyaid phyaid nhag' dag nhao la, airu: ngaid: re kao thao" sho' ngaui bau: zhao: yao: li" genae".15 Ngonhaung" yhin" pyam" ra" ayo, qug: khai: qhug' lai: lo va" zin na myo" laug: ru we' dakhyo: ngaui bau: nae" ayo, rere: byid: la,.16 Ni" mau" zo" jham ni" jeim qere ni" phung qab bao yao: bam: zo: myid: qere bao: qhu" na shao:.17 Ngonhaung" AsAng Mo"so: jeju wa ngonhaung" adao mae joe" veshao: wo". Ngo nhaung" zaui" ra" mau" rere: ngon- haung" tau: mae gang" tang: jo, nhao la, wo".