1 Mo"so we" no: khae khae mung: tae" gyo: byid: la, ngo masho: majhin: ru we' qug: khai: qhug' na:.2 Nga" AsAng Mo"so we" shaogyang" mo, mae bovao: ra" nga" solo re gug: gam mung: AsAng re khug ngha: na: ra" AsAng: jeim ngo re khyaid' yu la,.3 Mo"so we" ngo wa AsAng re khonhae" re: zag: yao: na: ru ngaid mung: nhag' myain" yu la,.4 Mo"so we" nga" AsAng re myid nghae" na: mathao mae ni" jeim pho" nhag' myid re yaug yo nhao la,.5 Mo"so we" AsAng wa gai: ra" nhag' myid , zang: qhao" nhag' myid we' byang" vin" mung: AsAng re mho' yao: ra" mo, alhab' re nhag' myain" jeju qhu" byid' na: ra".6 Mo"so we" ngo jhaung: mho' ra" dao: thoe re gyo: byid: la, mho' bain" ra" dao: re xam" to: byid: la, qug: khai: thaung" qhug' ra" au: AsAng re yao: ke' nae".7 AsAng re: lhaung" tae" gyo: byid' ra".8 Mo"so we" mo"so jham mae AsAng we' dau: ra" Mo"so mana. Ni" lo, mau" zo" ru" rure: majo, ngaid: ra".9 Mo"so we" AsAng phain" ke' ra" amyu" alhab' wa ni" qhid' kheim: mae goe; gam" mung: caung: khin" li" genae".10 AsAng wa qi" thao" myhao: thao" ra" yaug ngaid mung: mug' pho" mau" re kaid' na: ra". AsAng yao: za: Mo"so ngaid: ra".11 Mo"so we" AsAng: gau: khyo ngo re ceim" shid' la, Ni" dang main" khyo dang mae ngo cao" nae".Ni" mang khyao: re phug' myao" na veshao: nga" nhag' myid re jhain: byid: la,.12 Nga" AsAng Mo"so we" ngo wa AsAng re lam: maug yao: caung: khin" mung: ni" mang khyao: re khonhae" re: caung: nghaui" khin" na nae".13 Ngo the' yu: ra" nhag' myain" jeju wa myo: laug: ra". Nga" solo re no; thao" ra" movo: mug: mae" khyaid' khyi: yu byid: va".14 Mo"so we" ngaid beim" ra" mo, nga" qhid' au: mae to" ye; li" veko" ra". Byu qain qe wa nga" kao re kung" na: ako". Yao: bam Mo"so re pe" shui manho ko" ngaid: ra".15 Mo"so we" AsAng wa nhag' myain" myid jeju kaid' mung: zang: qhao" ra" nhag' myid nhag' khyag' nhag' myain" ru we' dao: so: we' byang" vin" ra" Mo"so ngaid: ra".16 Nga" shaid' khyo myo, khung: lhang mung: nhag' myain" yu la, Ni" kheim: so' qam: o: ni" jeim pho" re ni" khyaid' yu: ra" khyo dang ni" jeim myhi" yao: zo: re byid: wa,.17 Ngo re manug nhung: ra" mo, the' myao yang: qho' phau: vegeshao:. Gai: ra" ave, ngo re qhu" byid: la, khoru: ein: re Mo"so we" AsAng wa ngo re bao" thaug' mung: yaug yo nhao va".