1 Mo"so: jeju re caung: khin" mung: myhao: thao" ra" Mo"so: mang khyao: re nghaui" caung: nae".2 Tang: we' taui: daxe khe' de; ra" be; myhang" ja: we' gyo" pyo" ra" tang: we'3 Ne, seim mae ni" jeju re , myi" ayo, mae ni" dao: so: re lhug: paui: kyo: nae" gai: ra".4 Khoru: ein: re ni" mau" mae ngo re ngaui bau: nhao mung: ni" lo, mau" zo" mathao mae zhao: yao taung" caung: nghaui" nae".5 Mo"so we" ni" mau" khoqhi" qi" qhang: ra" i"?. Nao myid: to" ru wa no; thao" ngaid: ra".6 Ai re gug' nyhug' myid bo: ra" mo, maba: gyo: ko" ngaid: ra". Kopyaid' qe maba: myid: joe" kyao" ko" ngaid: ra".7 Tarha" macao" mo, vohau: ru: yaug: li" mung: shaid' nghung" ra" khyo: kaid' ra" mo, alhab' thug' li" ko" re byo, qeim: ra" khyo joe" nae" za: ngaid ko" ra".8 AsAng kam" wa malam: lai: qi" qhang: ra" Mo"so ngaid: ra".9 Mo"so we" AsAng: gyevo jham wa byo, qeim: qhug' mung: makhyang: mashab: mau" kaid' ra" mo, alhab' wa khyi" khao: ngo" khyo byo: sin" lo" li" genae".10 Nga" khyug re kam" wa dam: bug: khyug re" ru: nao zai" myhao byid: mung: xau asag' we' ngo re gyain: byid: va".11 Ngo re kung" qu" ra" mo, re ngo yao" myo; yang myao mung: gye she: ra" byu qain qe: akhyo re the' gyo: yang: ngo qam: o: gyo" qo" li" nae".12 Dang main" ra" yaug wa xaung" pa gae re"ru: bu" yaung" mung: Lebanon: bam mae" shaug' gae ru: qi" qhang: li" nae".13 Mo"so: yham mae qho" to" ra" mo, wa ngonhaung" Mo"so AsAng: vang" khug mae bu" yaung" li" genae".14 Kao qi: va" ayo, mae lhao" re: ashi: zaui: mung: xau bo: ru we' nyug lao qam" shi: genae".15 Yao: wa nga" laung: mo" baui ngaid: ra". Mo"so din: main" ru mung: matarha" ra" mae" yao: mae daja: re: majo, mabo ngaid: ra".