1 Myhao: thao" ra" Mo"so gug: gam: ra" jo, qo mae na: ra" yaug wa kheim: so' qi" ra" AsAng: bao qab mae khug ngha: na: li" nae".2 Mo"so wa ngo khug ngha qo , nga" zho: cang vang ngo lam jang" ra" Mo"so ngaid: ein: ngo ta" nae".3 Gaigai: sho: kung" yaug: lha" we' re: , shid ba: ra" mau byin: we' re: nao re loe, nhao: li" nae".4 Daung mug' yang nghoe' gam: to: mung: daung qab mae gug: gug: za: qhug' na: li" nae". Dao:so: wa ni" tau: go khao: boe" nae".5 Myi" mae" gyaug pho: we' na" gaung mae bag: ke' ra" myo: khe' ru:6 Mug: caid' yo mae su" lhang: qin" ra" mau byin: we' na" dao: gaung mae boe" ra" no qam" no jao re nao gyaug maca" nae".7 Ni" nhae mae byu dataung ni" lo, yo shaid' mae datug lang" lo" gengaid yang: re: ai: ru nao re the' zao" tin: nae" ma ngaid:.8 Gaigai: yao: ni" myo; yang qu" mung: tarha" macao" ra" mo; qobo re the' myao: li" nae".9 Mo"so wa ngo khug ngha jao: ngaid: ga: nao ta" mung: myhao: thao" ra" Mo"so mae ni" na jao: tae" va" ra".10 Nao mae aqug: aqae" joe" nae" mangaid: no phyo: qug: khai: ni" gaung mae joe" nae" mangaid:.11 Khyo khe' gau: khao: ngo" mae nao re lhaug' zaung" nae" tau: yao" mug: logyo: jham re yao: khang" to: va".12 Laug baui mae ni" khyid mathe' zao" thaung: shao: , yao: bam: lo; yang nao re lham: ge; vo; yu: li" nae".13 Lotin: we' mauibab: dao mae qo" su" qin" mung: Lotin: nau" we' maojaung: re qo" zab: li" nae".14 Yao: wa ngo re jhid' de; mung: ngo yao: re khyin: yu nae". Nga" mang khyao: re ba: ra" mathao mae ngo yao: re gug: gam: yu nae".15 Yao: ngo re khai: re ngo tau: byid: nae". Qug: khai" ru mae ngo yao: we' daga" na nae". Ngo yao: re xoe: yu mung: nga: yhe' nae".16 Ngo yao: re kao qhang myo, myi: nhao mung: nga" khyaid' khyi: yu: khyo yao: re ceim" shid' byid: nae".