1 Ngonhaung" qam: o: ngaid:ra"Mo"so re zhao: yao taung" nghaui" caung: ge,. Yaku' amyu" Mo"so re nghaui" myain" nghaui" thoe caung: ge,.2 She: myhang" nam be; myhang" ja: re ci: li" ge,. Gyo" pyo" ra" she tang: pag' tang: jham she: kyo: pag' kyo: ge,.3 Lho" xin" ba lho" lang" ba poe mae labo" maid ge,.4 Ai: ru wa Israel amyu" tau: dao: thang" we' Yaku' Mo"so: tarha" ngaid: ra".5 Maba: gyo" ra" myain" re ngo gyo" qu" va" mung: Egutu mang: mae lai: phyid' lo" ra" au: Yoseb' mae ai: khang" dao: tarha" re yao: to" to: va" ra".6 Ngo wa yao" yao" lo, sin mae" qo re vo; khyo" byid: va". Yao" lo, re re: qe" jo; mae" she: thug' yu byid: va".7 Nao qug: khai: thaung" qhug' ra" au: ngo re khai mung: ngo khyi: yu va". Mug: dam: thoe we' ngo nao re tau: byid: va". Meriba' qid yae mae nao re lag yu: qu" va".8 Nga" amyu" qe we" tae" gyo: ge, ngo pin dao: ta" nae". Israel we" nao nga" dao:9 tae" gyo" ngaid: re ,-- Nao mae getau: gyevo magai: na nae". Gemang: gedin" gyevo re magai: goe; pa" nae".10 Ngo wa nao re Egutu mang: mae" jhui" thug' lai: lo va" Mo"so ngaid:. Ni" nhaid' lae lae ho" wa, gyi: sho' ngo zho: jhaug' nae".11 Nga" byu jham kam" wa nga" dao: re magyo: ko". Israel amyu" wa ngo re ma o ngaui lo: genhaung i"?.12 Ngo re: yao: bam re nhag' lam: qao: ke' byid: mung: yao: bam wa yao: yao" nhag' myid khyo cao" lo" ko" ra".13 Nga" byumyu" nga" dao: tae" gyo: mung: Israel wa nga" khyo dang mae su" ngaid: re kam" wa,.14 Yao: bam cao" ko" ngaid: re yao: bam: gyevo re deim" zag: khyo" pye' mung: yao: bam nhaung" khoe' kaung: kag' ra" mo; adao mae dae byid: nae".15 Mo"so re manug nhung: ra" mo, yao" qhid' kheim: goe; gam" vegeshao: , nga" byu qe re: na tang ye, tang: li" genae".16 Gai: thao" ra" saungso cin: yang ngo yao: bam re khau nae". Laug pyo' mae" byo: yhid yao: bam re jhaug' gyo" na nae".