1 Nga" byu qe we" nga" tarha" re gyo" yu ge, nga" nhaid' thoe dao: re tae" gyo" yu ge,.2 Nga" nhaid' mae" vai:sham" dao: khyo" yang geco' ne, mae" vai: sham" dao: vho' jham re ta" kyo: nae".3 Phug' pho" qe ta" kyo: ko" mung: ngonhaung" ba: yu: ra" akhyo jham re4 Yao: bam: zo: qae: myid' xag' qe: qhid' kheim: mae ngonhaung" zug' to: nae" mangaid:. Mo"so re caung: khin" gai: ra" akhyo we' yao" kheim: so' qam: o: yao: kaid' ra" mug' pho" mau" zo" jham re yao: bam re ta" kyo: nae".5 Khoru: ein: re Yaku' amyu" mae sagso: dao: Israel amyu" mae khang" dao: tarha" re byid' to: va".6 Nhag' lam: madin: Mo"so mae nhag' myid solo dao: so: mazaung: ra" amyu" maboe" nae" rure7 Mo"so re lam khug: na mung: AsAng re mato" myhid' lo: za: yao: pin: to" ra" gu: alhab' re cao" nug sho'8 Thao phyao: na: li" nae" amyu" zo: myid: qe ai: tarha" re ba: gyo: mung: ai akhyo re zo: myid: qere mho" shid' vege- shao: ga: AsAng wa ngo nhaung" phug' pho" jham re khang" dao: to" to: byid: va".9 Ephrim: amyu" qe wa la: myo: ci ko" yang: re: mang: khaid' ra" au: thao khyo lhang: phaug' lo" genhaung i"?.10 Mo"so: dao: so: re yao: bam mabeim: mung: yao" tarha" re cao" pyang" nae" ha: pye' ko" ra".11 Yao: bam wa AsAng: mau" zo" we' yao: bam re qhu" byid' ra" mug' pho" mau" jham re to" myhid' pye' ko" ra".12 Egutu mang: Zona' din" mae yao: bam: phug' pho" qe: myo, qhao: tae mae mug' pho" mau" re kaid' qhu" va" ra".13 Qid dae re kho' sin" ke' mung: su" lai: phyid' lo" nhao: ra". Qid jham re sham" bam: to: byid' ra".14 Na" gaung re jham thaui" yang myi" mae myi: bao: yang khyo jhui" lo va".15 Seyo mae" laung: mo" baui kho' ke' mung: qid dae qid re" ru: myo: laug: ra" qid re byid: jhaug' lo va".16 Ai: laung: mo" baui mae qid zo: gyaung: yhug' ke' mung: qid zang gyaung: ru: yug: thug' nhao va" ra".17 Ngaid qere: yao: bam wa qobo xo' kaid' mung: myhao: thao" ra" Mo"so re gao sao yo mae tau: lhain: veko" ra".18 Yao: bam o: ra" zo: nam re mho' mung: nhag' lam" yang Mo"so re lag yu ko" ra".19 Mo"so wa seyo mae zo bo" re qo" nyhang" byid: nae" i"?, qu" qu" gelang:.20 Laung: mo" baui mae" qid be; thug' mung: qid gyaung: re" ru: yug nhao: ra". Cinman" rere: qo" gae byid: nae" i"?. Yao" byu qe: tau: zo: sho: qo" nyhang" byid: nae" i"? ga: Mo"so re nyung: ra" dao: jhau ko" ra".21 Ai: dao: re Mo"so the' gyo: mung: nhag' yo" ra". Yaku' amyu" mae myi: nga" mung: Israel amyu"qe mae nhag' gyid' ra" myi: thug' nhao: ra".22 Khoru: ga" re jham thaui: re yao: mho: to: mung: mug: gaung: kham: dung: re phung" ke' mung:23 Yao: bam zo: nae" tau: Mana' cinmain" mug qu: khyo" byid: mung: mug: gaung mae" cinmain" re yao: bam re byid' ra".24 Ai: byu qe alhab' wa kheim: so' qi: mo; zo: nam re la laug taung" qhug' zo: vege- shao: ga: kaid' byid: ngaid qere:25 Yao: bam wa Mo"so re malam jang" khyaid' khyi: yu: ra" jeju re makhug ngha lo: na ko" ra".26 Mug: gaung mae" ba thug' la re tam" pye' mung: qam: qi" ra" qid bang" la jhui" yu yang:27 Zo: sho: rere: myid phaui: lhug nho" , dao" ra" ngho' re qid dae yae mae" ma coe nho" yao: bam: adao mae qu: khyo" byid' ra".28 Yao: bam thang: na: ra" jo, qo avai: ayae mae gyo" nhao: ra".29 Aire" ru: yao: bam o ngaui ko" ru we' dakhyo: byid: yang: yao: bam re: gyi: gyi: baug baug qhug' zo: ko" ra".30 Yao: bam shu: ra" zo: nam re nhag' madag: ru zo" na ko" ru mae ‚31 Mo"so yao: bam re nhag' qu" yo: yang: qao" zin" ra" mo, re se' pye' mung: Israel zolau: qere deim" lhang" pye' ra".32 Ngaid qere: yao: bam mae" re: axo' kaid' na shi: ko" ra". Yao" mug' pho" mau" re re: malam jang" ko" ngaid: ra".33 Airu: mung: yao: bam ba na ayo, re aje amyid mae na: lai: pye' mung: yao: bam: zin na jham qug: khai: mae nab; na nhao: ra".34 Ai bam re se' pye' lao" yao: bam: Mo"so re qho ko" ra". Mo"so jhao" dam: tug' lo yang: Mo"so jhao" qho ko" ra".35 Mo"so wa yao: bam: khug ngha laug mo" baui , myhao: thao" ra" Mo"so wa yao: bam re khyaid' yu: ra" AsAng ngaid: rure ba beim" li" ko" ra".36 Ngaid qere: AsAng re nhaid' thoe: yang jhu" mung: sho: yang re: mhug' vhain" dao: jhau ko" ra".37 Yao: bam: nhag' myid kam" wa Mo"so: qhid' kheim: mae to" ra" dao: so: re macao" pyang" lo: na: bam ko" ra".38 AsAng wa nhag' myain" myid bo mung: yao: bam re maphyo' qheim" lo: qobo lhoe' byid: va" ra". Myo: sho' lhang nhag' yo: gyo" mung: nhag' lam: laung: rure deim" zag: to" ra".39 Yao: bam wa gaung sho: ngaid ko" rure shid: lo" lao" madam: ba: lhang" lo: lo" ra" so zo: ngaid ko" rure myid: beim" ra".40 Seyo mae yao: bam wa AsAng re tug' shai" mung: gao so yo mae myo: sho' lhang nhag' kaug' nhao vege nhaung i"?.41 Mo"so re myo: sho' lhang tug: yu: qu" mung: Israel amyu" mae shaogyang" ra" Mo"so re tug' shai" vegenhaung i"?.42 Yao: bam re gyevo: lo, mae" re: , qug: khai: khug mae" re: khyaid' lhoe' yu: ra" ba na ayo, mabeim: maso: ko".43 Egutu mang: mae lo, mau" ve, lho sagso: jham re re: Zona' din" yo mae mug' pho" mau" re re: zaui" qhu" lo va".44 Ai: mang: din" byu qe qid maqhug' shaug' geshao: ga: , Qid gyaung: qid thug' jham re sa: tham: boe" nhao va".45 Yao: bam re bin" mho' jham re re: phyo' qheim" ba: ra" po: rere: nhao: ke' byid' ra".46 Yao: bam: qhovo: qhoshi: re bothaung bojin: jham re yao: bam: gaugzo jham khyag' phaung" jham re byid' pye' va" ra".47 Yao: bam: sabyi' naui jham lag qu: yang pho' ham" gae jham nghin phyu: yang phyo' qheim" pye' byid' ra".48 Yao: bam: nung: jaung yao jham re lag qu: yang khau myhung: to" ra" gug' nyhug' jham re lhe' caid' myi" yang se' pye' byid' ra".49 Nhag' lam: yo" gyid' lang" ru: yang: makhyang" ra" logyo: re nhao: ke' mung: yao: bam re nghoe' gam: ru qobo dae byid' ru , nhaung" khoe' kaung: kag' ru boe" nhao: ra".50 Yao" nhag' yo" ru thug' ye, nae" ga: yao" khyo dang re nyhang" mung: yao: bam: kao so' re o: mabyid lo: shid genae" tau: no qam" khyo" yang: yao: bam re se' jheim" pye' ra".51 Egutu mang: mae zo: jhid' jham rere:, Hama' zo: qe: jo, qo mae kheim: so' qi: mo, re re: dae byid' ra".52 Yao" byumyu" qere kam" wa yao jham re" ru nha: to: mung: seyo mae yao: bam re yao zhain re" ru: jhui" lo" ra".53 Qug: khai: kyin" nhaung" loe, sho' jhui" lo yang: yao: bam magyaug maci" ko" ngaid: ra" gyevo qere kam" wa qid dae qid: yang nghoe' bam" pye' ra".54 Shaogyang" ra" mug: kyo: joe" sho' re: lo, yo lo; yang qo" sang nae" ce: bam khyo re: yao: bam re jhui" dai" lo" ra".55 Yao: bam: qhid' au: mae re: getau: byumyu" qere khe' thug' pye' yang: Israel amyu" aboe: nge, ma khae: yu nae" mug: myid re ka" mung: gae: myho" byid' ra".56 Ngaid qere: yao: bam wa myhao: thao" ra" Mo"so re ca: lag: yu mung: tug' phaug' ko" ra". Yao" sagso: dao: so: rere: macao" ko" ngaid: ra".57 Phug' pho" jham reru: yao: bam nhaung phaug' geyang: dao: so: majo, ko". Kaui: ra" myo: khe' we' dakhyo: magai: lam ngaid: ra".58 Yao: bam wa nyhao" ra" jo, qo jham khyo"yaug yao: re nhag' zai" yho: ko" ra". Solo jham khyo" yang re: , yao" manug makhyaid' myid re lhau: pug byid: ko" ra".59 Mo"so ai: akhyo re the' gyo: mung: nhag' lam: laung: na: ra". Israel amyu" re gyai yao: qu" ca' pye' ra".60 Yao: wa shi: lo" seim zaung ga" ra" byu qe: ayaung mae kaid' to" ra" zaung re to" pye' co' ra".61 Kheim: so' ham" hung: re qab yu: lo" nae" re: , phung bao re gyevo: lo, khyo gyo" vao nae" qhaug' to: co' va" ra".62 Yao" amyu" jham re re: shae gye mae qhaug' mung: yao" khyao kham khyao khae: Ma re nhag' yo" gyid' ra".63 Zoqae zolau: jham myi: nga" ru phau: ko" qere: zomyi: qe magai ngug genae".64 Khin jaung qe shae gye mae shid ko" qere: cug' mo" qe magai: kaug' ngug genae".65 Alao" AsAng wa yab mo" myid' ra" yaug beim" ruru: sabyi' qang" mathao mae zag: hug' ra" sulhe: pho" re" ru: beim" to" li" ra".66 Yao" gyevo qere te' mung: zaid: phao: lo" nhao yang: qho' phau: nhao: ra".67 Ngaid qere: Yoseb; seim zaung re ha: pye' mung: Ephrim: amyu" re makhyin: yu ngaid: ra".68 Yuda amyu" we' yao" jhid' de; ra" Ziun: bam re khyin: yu: ra".69 Gyag maqui: thain" madaui jo;jo; ra" mug: myid re" ru: yao" shaogyang" ra" jo, qo re de" to: va" ra"..70 Yao" jeim Davi re khyin: to: mung: yao phaung mae" yao: re khyin: yu: ava".71 Yao" amyu" Yaku' we' yao" khyao kham khyao khae: Israel re qu" gam caung vege- shao: ga: caid' nau" jhui" ra" caid' zang jham re qu" gam: na: ru mae she: yu mung: yao" byu ga" ra" Yaku' amyu" ma ngaid: ra" Israel byu qe qu" gam khau: qhang" nae" qo vhin: to: va" ra".72 Ai: yaug wa dang main" ra" nhag' myid bo: ru we' dakhyo: qu" gam zho: jhaug' mung: juyi bo: ra" lo; yang jhui" zug: gam: ra".