1 Ngo wa nga" nhaid' sho thoe: yang Mo"so re zag: yao: hug' ke' re Mo"so wa nga" dao: thoe re gyo: byid' ra".2 Qug: qe" thaung" qhug' ra" au: Mo"so re qho: ra". Myi" mae nga" lo, yheim" qang: to: yang: na ngaid qere: nga" solo wa yaug yo: ru maqhug'.3 Mo"so re myid: beim: mung: myid myo: myid laug: na:. Myid nghae" mung: nhag' lam: shoe: byaug: ru mae joe" ba: ra".4 Nga" myo, qid re nao zaui" zag: ci mung: ngo apyi avhang: boe" mung: dao: maba: jhau: byaug lo: ngaid: kyi:.5 Geco' ne, lai: lo" va" ba na ayo, we' ge nhae" mae" ta re ngo myid: nghae" qu" na:.6 Myi" mae" nga" nghaui" caung: dao: thoe ngo beim" na mung: nga" aung khug mae myid: qu" na:. Nga" solo re: Mo"so: khyo re ca: qu" na:.7 Mo"so wa khonhae" re: shepye' to: nae" laug i"?. Thao dalhang jeju mabyid: lo: nae" laug i"?.8 Nhag' myain: nhag' khyag' ru gain: byaug va" laug i"?. Yao" dao: so: data we' data mae malam: lai: byo; lo" byaug nae" laug i"?.9 Mo"so wa nhag' khyag' sho: gu" rure to" myhid' pye' va" laug i"?. Nhag' yo: yang: jhid' de, kao taui" ra" nhag' myain" myid re zang" na: laug i"?.10 Alao" ngo wa ai: mau" zo" jham re ngo yao: thaug' qhao" ra" Mo"so kaid' ra" mau" ngaid: ra" ein: ngo ta" na va".11 AsAng we" ngo wa ni" qi" qhang: ra" mau" zo" jham re myid: beim: nae". Qhid' phyao: boe" lai: lo va" mug' pho: jham re myid: beim" na nae".12 AsAng kaid' ra" mau" alhab' geim" re ngo myid: nghae" qu" na:. Ni" qi" thao" ra" mau" zo" re myid: tau" nghae" qu" na:.13 Mo"so we" AsAng: khyo dang wa shao lho" ra" khyodang ngaid: ra". Mo"so tho' je: qi" ra" mo"so wa khag' ngaid: ra" i"?.14 AsAng wa mug' pho" ra" mau" jham re zaui: so" ra" Mo"so ngaid: ra". Byumyu" qere kheim: so' qam: o: ci: qhu" va" ra".15 AsAng: byu ga" ra" Yaku' we' Yoseb' amyu" re lo, lam" yang khyaid' khyi: yu va".16 Mo"so we" qid dae jham wa nao re myao veko" ra". Qid dae jham wa AsAng re myao mung: gyaug veko" ra". No; thao" ra" jo, qo jham re: daui: nain" lab: na veko" ra".17 Jham thaui: jham wa qid re vhe' khyo" ke' mung: mug: gaung wa mug: dam: thoe ke' ke' ra". Ni" myo: khe' jham wa khyi" khao: ngo" khyo byo: sin" lo" ra".18 AsAng: mug: dam: thoe wa la sham" mae bo mung: lhe' caid' yang myidkin re bao byid' ra". Myidkin re: nin" mung: laui" nain" na: ra".19 AsAng wa qid dae mae gyo" li" mung: ni" khyo dang wa lae: ra" qid dao mae ngaid mung: ni" khu re khag' mathe' myao ngaid: ra".20 AsAng wa Moshe we' Arun" lo, khyo" yang ni" amyu" qere yao zhain re" ru: jhui" lo va" ra".