1 Mo"so we" ngonhaung" re pe" mung: cere" ru: shepye' to" i"?. AsAng mae gyo, zo" ra" yao jham re pe" mung: nhag' yo" gyid' ra" i"?.2 Geco' ne, mae" sang: lo: ra" byu mo, mo" thaui: rere: khyin: yu: ra" byu qe: tau: re: , nao ab' na jao: Ziun: bam rere: myid: beim: wa,.3 Abyo, acui: mung: na: ra" jo, qo khyo li" qu" qu" wa,. Ni" shaogyang" ra" jo, qo re yao: bam phyo' qheim" pye' veko" ra".4 AsAng: byu qe ham phaung: ra" jo, qo mae gyevo jham zag: hug' na ko" ra". Yao: bam: ve, lho re ai: jo, qo mae to" to: veko" ra".5 Ba jhao yaug thao" paung" re vo: zaung" yang myo" pye' re" ru:.6 Ana" yao:bam wa pa" jhaung: yham zai yo jham re vo: zaung: , jo, to' dau we' dalhang: dae be; khyoe' pye' veko" ra".7 Shaogyang" ra" jo, qo re myi: ngha" pye' veko". Ni" mang khyao: na nae" seim zaung re yao: bam wa myid mae te' sho' phyo' khyo" pye' veko".8 Ce: byumyu" alhab' geim" re phyo' sin" pye' gelang: ga:ta" mung: myid gye, geim" mae Mo"so: ham phaung jao: jham re myi: ngha" pye' ko" ra".9 Ngonhaung" ve, lho so: xam: re ngon- haung" mathe' myao lo:. Ana" ayo, mae lapa re: mana. Ngonhaung" mae yo, gin ba: phag' byid' ra" byu mana:.10 Mo"so we" kho myhao" joe" sho' gyevo jham khang: nhau" na genae" i"?. Tau: lhain: mo, wa ni" mang khyao: re khomyhao" joe" sho' khyoe' na ge nae" laug i"?.11 Ni" lo,yo lo, re nao pe" mung: she: yu: i"?. Aire qao gao mae phoe' thug' mung: phyo' qheim" pye' wa,.12 Mo"so wa geco' ne, mae" nga" jhaung zug: ngaid: ra". Yao: wa myid gaung: dao mae khyaid' yu: khyo phung" byid' to: va".13 Mo"so wa kheim: so' yang qid dae re kho' sin" ke' ava". Qid khug mae" qid dao kha" au: jham re be; khang" pye' va" ra".14 Mao jaung" au: re nao be; khyoe' khyo" pye' mung: seyo mae" gug' nyhug' jham: zo: nam poe" pye' va" ra".15 Qid thug' qid baug: jham re baug: thug' li" nhao mung: yug: na: ra" qid gyaung: re kin" lo" nhao va" ra".16 Na" rere: , myi" rere: nao sang: ra". Ba mae" ru lho" bao jham re nao phain" ke' ava".17 Mang: khao: ngo" mae" mug: khyo re nao ka" byid: mung: , Zin vao kheim: we' xaung: gaung ga: kho' khaui" to: va" ra".18 Gyevo jham wa Mo"so re jung" khyoe' mung: makhyang" ra" mo, wa ni" mang khyao: re maphug' makhyaid' kaid' ko" rure myid: beim: wa,.19 AsAng: phaung" kyug' kao re zoqhid jham re da qhaug' pye'. AsAng: myaung sho: mo, phaung re khonhae" re: dato" myhid'.20 To" to: va" dao: so: re myid: beim: wa,. Ai:mang: din" ajheim ajhe' khain mae lhaid' zo: lhaid' shaug' pyam" yhin" ru shao shao ngaid: jo; ra".21 Pyam" yhin" qug: khai: thaung" qhug' na: ra" mo, nhag' lam: magyang: gyo" veshao: , sho:jhin moe, shab' ra" mo, wa AsAng: mang khyao: re caung: khin" geshao:.22 Mo"so we" to" li" lo wa, Ni" mau" re qid' mung wa, , makhyang: yaug wa AsAng re jung" khyoe' na: ru re myid: beim: wa,.23 AsAng re gye kaid' ra" mo; yhai thoe wa je: za: qi" lo: na: ra".