1 Mo"so we" ngo AsAng mae khug ngha: na:. Kho nhae" re: qho' gyaug phau: zai mangaid:.2 Ni" dang main" ru we' ngo re lhoe' yu mung: loe, beim nhao la,. No: khye' re nga" shaid' khyo lhang: ke' mung: khyaid' yu la,.3 Nga" tau: mae ngo kho nhae" re: vao: laung" na nae" laug aug' boe" wa,. Nga" laung: mo" baui we' gang" tang: ra" zho: cang yham mae ngaid: ra" mathao ngo re khyaid' yu nae" ga: dao: ta" to: va".4 Nga" Mo"so we" makhyang: mo; lo, mau" re: , tarha" macao" ru we' byu qain: lo, mae" re: ngo re khyaid' thug' yu la,.5 AsAng we" nao wa nga" nhag' nghae" jao: ngaid: ra". Ngo ngai shi" yo, mae" yao: nao re lam khug: lo va".6 Ngo khau: qhid: ba mae" yao: AsAng re khug ngha: lo va". Nga" myhi" aung mae" yao: jeju re the' khae: yu: lo va". AsAng re caung: khin" na nae".7 Byu myo: sho' mo; qhid' kheim: mae mug' pho" ru ngo boe" na:. Ngaid qere: AsAng wa nga" gang" tang: ra" khug ngha qo ngaid: ra".8 Ngo wa ne, qug: nao re caung: khin" byid' na nae".9 Ngo mao: lao" ngo re dashe: pye' to: la,. Ngo qam: nang" byaug: re ngo re za: danha: to: la,.10 Gyevo qe wa nga" akhyo re ta" na veko" ra". Nga" kaoso' re kung" ra" mo, daga" za: ham: na veko".11 Mo"so yao: re za: tang" to: co' va" ra". Cao" khe' myhag' yu gelang: , yao: re li" khyaid' yu nae" su mana ngaid: ra" ga: ta" na veko".12 Mo"so we" ngo we' va: va: mae dana. Nga" Mo"so we" ngo re bao" yu nae" hin wa,.13 Ngo re gye she mo, wa seim" mung: gain: thao" lo" vegeshao:. Ngo re magai: ra" khyo" kaid' nae" ga: myid: na mo, wa qho' phau: mung: myo, nho sham vege shao:.14 Ngo kam" wa khonhae" re: myid: nghae" na mung: AsAng re caung: thoe caung: khin" na nae". Ngo wa AsAng re je yang: je yang: caung: khin" na nae".15 Nga" nhaid' sho ne, qug: malam: lai: ni" dang main" ra" khyo we' ni" khyaid' khyi: yu: akhyo re ca: qu" na nae". Ai jham khonho" myo" laug: ru re ngo matho' qug: nghe' ngaid: ra".16 AsAng: phung bao re ngha mung: AsAng: dang main" ra" tarha" re qhu" byid' na nae".17 AsAng wa ngo re ngai: ra" ayo, mae" mung: mho" shid' lo va". Ana" ba joe" sho' mug' pho" ra" mau" ngo re qhu" lo va".18 Mo"so we" ana" ta thao: ta mae ni" lo, mau" zo" ni" kheim: so' qam: o: re ngo qo" ci: qhu" ra" ba na ayo, joe" sho' ngo mao: yang: au: phyu ngaid qere: ngo yao: re za: danha: tang" to: la,.19 Mo"so we" ni" dang main" ru wa gyai myhao: ra". Mau" zo" myo: sho' zaui: so" ra" Mo"so we" nao we' dau: ru khoyaug ngaid: ra" i"?.20 Qi" thao" qain: thao" ra" qug: khai: jham re ngonhaung" re qhu" byid: va". Yaug yo: ru re: byid: mung: mug: myid no; thao" ra" akhug mae" dalhang dam: daui: to" nhao va".21 Ngo re na gai gaug qo" nhao mung: dalhang yaug yo cae: tae" ru byid: va" ra".22 Aimung: nga" AsAng: we" AsAng we" dao: so: re tang: she mung: caung: khin" nae". Israel amyu" shaogyang" ra" Mo"so: qhid' kheim: tang: be, mung: nghaui" thoe nghaui" nae".23 AsAng: qhid' kheim: mae nghaui" thoe nghaui" au: zhao: yao: ra" nhaid' sho bo: li" nae". Khyi: yu qhug' ra" nga" so zo: re: zhao: yao: li" nae".24 Nga" sho dang main" ra" tarha" re khon- hae" re: ta" na: li" nae". Khoru: ein: re ngo re qobo qho nhao nug: ra" mo, wa myo, nho sham mung: qho' phau" ru qhug' genae".