1 Mo"so we" jhaung zug: pho" re ni" tarha" dao: phyid' ra" akhyo. Jhaung zug: nau" re ni" dang main" ra" myid ke' byid: wa,.2 Alao" yao: wa ni" amyu" re dang main" ra" khyo" , ni" sho: jhin: ra" mo, re tarha" din" ra" khyo" dao: phyid' byid' na veshao:.3 Bam zo: bam zang jham wa tarha" ra" khyo" yang AsAng: byu qere yaug yo: ru byid' li" genae".4 Aqug: aqae" qhug' ra" mo, re yao: tarha" dao: phyid' byid: veshao:.Masho: majhin mo; zo: dau qere yao: khyaid' yu mung: yhin" pyam" ra" yaug re yhin" veshao:.5 Byu ngug xe qae: mae ba kyi lho" mo" za: ajo; jo, wa byu aqae: qae: mae" mo, alhab' wa AsAng re gyaug phug' na: li" genae".6 Ai: jhaung zug' kheim: so' wa vohau: yo mae mug: qu byid' ru ru: , myid gaung re jhug' dag nhao: ra" mug: ce' ru: ngaid veshao:.7 Yao" ta mae lho" mo" za: azho: na na wa tarha" cao" ra" yaug wa bu" yaung" zhao: yao na gai: ru myo" laug: li" nae".8 Qid dae mo" dadae mae" dadae joe" sho' qid mo" lao mae" mung: mug: myid athao" joe" sho' yao: ug: na veshao:.9 Seyo segae: mae na mo, yao" qhid' kheim: mae goe; gam" mung: yao: re tau: lhain: mo, phaui: lhug bam mae lha" yo, vegeshao:.10 Tarshi we' gogyo: kao" mae" jhaung zug: qe jhaung qhu" li" jhaung mung: Sheba' we' Sheba' jhaung zug: qe khang: ke' na vegeshao:.11 Jhaung zug: qe alhab' wa yao: re goe; pa" mung: byumyu" cao jab yao: re caung da" na vegeshao:.12 Khoru: ein: re moe, shab' yaug zag: yao: ra" au: , ai: yaug re khug ngha jao: maqo" myaung sho" ra" yaug re re: yaug yo nhao: li" nae".13 Myaung sho: yaug we' vae: moe; qid shab' yaug re nhag' myain: mung: moe, shab' phau" ra" mo; kao re khyi: yu: li" nae".14 Se' da: be, khyaid' we' deim" zag zo: mo; lo, mae" yao: wa yao: bam: kao so' re phoe' she: yu: li" nae". Yao: bam: sa: re o: byid: ra".15 Yao: kao daui: na: dalo: gyo: mae byu qe wa Sheba' hhang re dai" byid: geshao:. Yao" tau: mae malam: lai: jhaung: mho' byid' na vegeshao:. Mo"so: min gam jeju wa yao" dao mae khonhae" re: ajo; jo, veshao:.16 Mang: din" mae gaug zo myo: sho' bam: zao: jo, mung: qhovo: qhoshi: jham wa Lebanon: bam re" ru: bam nyaug mae byang" jo; li" nae". Vo byu tham: byu qere: vohau: yo ru: na gai: li" genae".17 Yao" mang khyao: wa kho nhae" re: agang" tang: jo, veshao:. Ba za: ajo; jo, wa yao" mang bu" yaung" na veshao:. Yao" mathao byu qe wa nga: lho" na vegeshao:. Na mae" na wa yao: mae nhag' dag: na vegeshao:.18 Israel amyu" AsAng wa nga: lho" na veshao: wo". Mug' pho" mau" re yao: za: aqo" kaid' ra".19 Yao" ham" hung: qi" ra" mang khyao: wa getam: geto nga: lho" na veshao: wo". Mug: myid gye, geim" mae yao" phung qab bao byang" vin" na veshao: Amen.20 Yese" yao: zo: Davi jhaung: xe: mho' dao: bin va".