1 Gaigai: yao: Mo"so wa Israel qe mae" nhag' lam: shao lho" ra" mo, re nhag' myain" jeju qi: byid' ra".2 Ngo kam" wa khyid kolhag' lhag'mung: zab: jhaid' lang" lo" na va".3 Tarha" macao" mo; jo, nho" re the' myao lao" makhyang: mashab: ra" mo, re ngo qu" nhung va".4 Yao: bam qug: khai: kyin" nhaung" ma qhug' ko" ngaid: ra". Yao: bam xau lam: lateim" ngaid ko" ra".5 Yao: bam mae mug: myid qug: khai: mabo ko" mung: su geje re" ru: no phyo: ma thaung" qhug' ko" ngaid: ra".6 Aimung: ngaid beim" ru wa yao: bam: lang zang: mae qui: re" ru: ve; ci ko" ra".7 Xau: nyam ko" ra" mathao yao: bam: myo, jid' mau: de; mung: byaug ko" ra". Yao: bam ta" dao: re: sheve, ze ko" ra".8 Yao: bam wa magai: ra" pyam" yhin" rure jung" qi: pye' mung: kheim: co' dao: za: ba: ta" ko" ra".9 Yao: bam: nhaid' wa mug: gaung we' vo, ae shai" mung: yao: bam: sho re: myid gaung: dao mae yain" lhang: qin" ko" ra".10 Aimung: Mo"so: byu qe lao" yao: bam jhao" jhin" te' ye: mung: qid shaug' ruru: makhyang" ru jhab' shaug' ko" ra".11 Mo"so khoru: gai: ba nae" i"?. Myhao: thao" ra" Mo"so mae Solo du" ra" nyain: wa bo: ra" laug i"? ga: ta" ako".12 Ai: tarha" macao" ra" mo, wa gai: li" mung: jo, nho" gai: qo" li" ko" ra".13 Gaigai: yao: nga" nhag' lam: re ngo shao kyang" nhao qere: so' ha" maqo". Qobo made, lo: sho' nga" lo, re cid' shao ngaid qere: pe" maso' ha".14 Ne, qug nhaung" khoe' kaung: kag' ru we' ne, seim khao: ngo" mho" shid' ru qhug' ra".15 Ngo ai ru" dao: ta" ngaid: re wa AsAng: byumyu" qere shaid' nghung: nae" khyo: boe" zai ngaid: ra".16 Ai: mau" re ba: gyo: sho' ein: myid: nghae" qu" au: re ai wa nga" tau: mae gyai yao: qug' ra" mau" ngaid: ra".17 Ai: thao Mo"so: shaogyang" ra" yham khyo vao ye: mung: yao: bam gain: thao" lo" nae" akhyo re the' myid: beim" ra".18 Gaigai: yao: nao wa yao: bam re jhug' nyhaid' ra" jo, qo nha: to: mung: byo, qeim nae" gau: khyo khyo" ke' ava".19 Dazab za" gyo: mae yao: bam byo; qeim: byaug vegenhaung i"?. Qug: khai: mo" we' yao: bam byo; qeim: lo" vege nhaung i"? AsAng we".20 Byu wa yab so: to" lao" yab mo, re pe" dao" manghae" re" ru: AsAng we" nao beim" to" li" re yao: bam: bao qaung re lao" qu" ca' li" nae".21 Nga" aung khug: nhag' myid laung: nga" na mung: nga" no ce' sang: kheim: byain: byaug: ru: yang22 Pe" re: maba: ra" sufang: ngaid mung: ni" qhid' kheim: mae gug' nyhug' re" ru: ngo boe" na:.23 Ngaid qere: ngo wa AsAng we' daga" na: na: ru mung: nga" lo, yo lo, re nao zaui" zag: ci byid' ra".-24 Ni" juyi khyo" ngo re jhui" yu mung: lo" thao" mae phung bao we' ngo re lham: tug: yu: li" nae".25 Mug: gaung: dao mae AsAng mae" lai yang: ngo getau khag' re qo" ca" nae" i"?. Nao re qo" lao" wa myidkin re ngo pe" khug cang bo lo: nae" i"?.26 Nga" nhag'myid we' gaung sho: byaug: lo" ngaid qere: Mo"so wa nga" nhag' lam: laung: mo" baui we' data geim" mae" khyao kham khyao khae: ngaid: ra".27 Nao we' va" na mo, wa byo; qeim: lo" genae". Nao we' gao" lin: na mo, re nao sham" khyo" pye' nae" ngaid: ra".28 Ngo kam" wa Mo"so jhao" qui" te' ye: mung: so' ha" qo" ra". Ni" lo, mau" zo" alhab' geim" re qo" ca: kyo: sho' Mo"so mae nga" lam khug jo, qo ngo to" to: nae".