1 Mo"so we" ngo re khyaid' yu la, nga" kao so' solo joe" sho' qid lheim" lo va".2 Khyid' khyo" qo majo; ra" tham: nheim" bam" mae nab: lo" na va". Khyaung: ho sho' zag: yao yang: gyai myaung" byaug kyi: va".3 Nga" Mo"so re nghao" qu" mung: myo, go: byaug va".4 Pe" akhyo majo; ru ngo re qu" nhung: ra" mo, wa nga" au: dai: xae khe' tho' myo: ko" ra". Madang mamain" ru ngo re gye she mung: phyo' qheim" ra" mo. wa qam: gyai bo ko" ra". Ngo mayu qere: ngo dam: byid: ca" ra".5 Mo"so we" ngo makhyang" rure nao ba gau ngaid: ra". Ngo shaid' nghung" qobo re ni" qhid' kheim: mae maqo" nyham" to: ngaid: ra".6 Mo"so we" AsAng re myid: nghae" na: ra" mo, nga" mathao mae nhag' lam: dagyug: nhao. Israel qe: Mo"so we" AsAng re qho: ra" mo, wa nga" mathao mae qho' phau" ra" ru maqhug' ve geshao:.7 Ngo wa ni" mathao mae jung" khyoe' ru phau" lo va". Ngo wa myo, qho' gyai bo: byaug: kyi: va".8 Nga" mao: nhaung: qe: akhug mae byu bang" ru: boe" na:. Da aung mae" gyo" mo; khug mae re: taung bug lamai: ru: boe" byaug va".9 Ni" yham mae nhag' taui" ra" myid: yang ngo re zo" pye' yang: nao re ceim" nhang: ko" ra" mo; dao: thoe re wa nga" dao mae kai" to" ruru: boe" va".10 Ngo nhag' kaug' ru we'ngug zo" re" zo: shaug' zang" na ngaid yang: re: jung" khyoe' gaui mho ko" ru za: phau" na:.11 Ngo jid: mo" mai bau: ve; ci yang: yao: bam ngo re ceim" qi: jung"pye' ko" ra".12 Vogaung" kham: dung: mae zaung: jo, mo, nga" akhyo ta" mung: fonain: qe ji: dao: khyo" ngo re khyoe' ko" ra".13 Mo"so we" ngo kam" wa gai lho" ra" ayo, mae AsAng re mho' yao nae". Mo"so we" nhag' myain" ru we' dakhyo: khyaid' nae" dao: so: we' daru: za: nga" dao: thoe re tae" gyo: byid: la,.14 Ngo re tham: nheim" bam" mae" xoe: yu la,. Ngo re manug nhung: ra" mo; lo, mau" re: , no; ra" qid khug mae" re: loe, veshao: wo".15 Qid moe dang" yang ngo re ma nhai" veshao:. No; ra" qid khug khyo manab; vao: lo" shao: nga" dao mae qid dung: re maphyid' geshao:.16 Mo"so we" jeju kaid' nug: ra" nhag' myain" myid wa gai: ru ngaid: ra" mathao mae nga" dao: thoe re gyo" yu byid: la,. Nhag' myain: o ngaui: ru myo" laug: ru we' daru: za: nga" shaid' khyo lhang: phaug' lo wa,.17 Qug: khai" ru qhug' na va". Ni" jeim pho" mae" ni" myo, khung: dalhang: phaug' lo" byid: la, hin hin tau: byid: la,.18 Nga" kao so' khyo qui" te' li" mung: khyi: yu la, nga" gyevo qe: mathao mae ngo re khyaid' khyi: yu la,.19 Ngo phau" na: ra" jung" khyoe' ru: qho' phyo' ru nga: khyoe' ko" ru jham re AsAng ba: na gau ngaid: ra". Nga" gyevo jham wa AsAng qhid' kheim: mae ngaid ko" ra".20 Jung" khyoe' ko" ru: yang ngo nhag' lam: thao" va". Nhag' khyag' nae" byu re qho ngaid qere: mathe' myao , nhag' tang" byid: nae" byu qho ngaid qere: mathe' myao.21 Nga" zo: nam mae khin cid' ke' byid: ko". Ngo qid shab' ra" au: shi: jhin qang: jhaug' ako".22 Yao: bam: zo bo" wa yao: bam: tau: lha" ru: , phau: ang: ra" qobo dae we' kyam: thaung: ru: boe" vegeshao:.23 Yao: bam: myo, mamyao lo: sho' go: byaug vegeshao: , yao: bam: phyid' dam: re: gyug' goe; byaug vegeshao:.24 Ni" nhag' gyid' ru re yao: bam: au: dao mae vhe' sheim: mung: nhag' yo" gyid' ru wa yao: bam re khe' myhi veshao:.25 Yao: bam: yham qo wa cae: jhug tag boe" mung: yao: bam: zaung khyae: mae dayaug re: adaui mana: dang vegeshao:.26 Yao: bam wa qobo dae phau" ra" yaug re ceim" yhin" ko" ra". No yaug re je: no nae" khyo: kaid' ako".27 Yao: bam: qobo mae qobo dam: laung: byid: wa,.Ni" dang main" ra" jao: mae yao: bam re dabo: ke' yu byid: la,.28 Kaoso' tung" paug' mae" yao: bam: mang re soe' said' khyo" mung: dang main" ra" mo; mang tung" to" ru mae yao: bam: mang mabobo veshao:.29 Ngo kam" wa qug: khai: kyin" nhaung" we' sho: jhin: ru qhug' na: ra". Mo"so we" ni" khyaid' yu: ra" jeju ngo mae nga: ye, veshao: wo".30 Mo"so: mang khyao: re nghaui" caung: thoe we' ngo caung: nae". Jeju so" ru we' ngo yao: re khin" na nae".31 Mo"so wa khyug we' khyid sin: we' jab: ra" nung: jaung lo: tho' mae gai: ra" ave, re je: nhag' dag: li" nae".32 Nhag' lam: nau" nhae" mo, ai re myao mung: ngaui bau" li" genae". Mo"so re qho: ra" mo, nhag' myid mae qam: o: byang" li" genae".33 Mo"so wa myaung sho: mo; dao: thoe re tae" gyo: byid' ra". Kyam: laung" ra" yao" byu qere mato" myhid' ngaid: ra".34 Mug: gaung myid gaung qid dae jham we' daga" khyi" khao: ngo" mae" na mae" na alhab' geim" wa Mo"so re caung: khin" caung: nghaui" na vegeshao: wo".35 Mo"so wa Ziun: vogaung: re khyaid' khyi: yu mung: Yuda, vogaung: jham re de" to: byid' ra". Ai mae yao: bam na mung: sang: yu: li" genae".36 Yao" daui mung mo, wa ai: vo re maqo" khae: yu mung: yao" mang khyao: re jhid' kao: ra" mo, ai: mae na: na genae" ngaid: ra".