1 Mo"so to" ye; li" mung: gyevo qe wa khyi" khao: ngo" khyo byo: sin" lo" geshao: wo". Mo"so re manug: ra" mo, yao" qhid' kheim: mae" phao: tao" lo" geshao:.2 Myi: khug' thaui: baui" ru we' dakhyo: yao: bam re baui" lo" nhao wa,. Byo: min" wa myi: mae aqang: boe" lo" ru we' dakhyo: yao: bam Mo"so: qhid' kheim: mae byo, qeim: lo" geshao:.3 Din:main" ra" mo, ngaui bau: yang: Mo"so: qhid' kheim: mae zhao: yao: ra" nhag' myid we' gyai ngaui bau: geshao:4 Mo"so re nghaui" caung: ge, yao" mang khyao: re caung: khin" ge, jham thaui: jui: yaug: tau: mae khyo nyhang" to: ge,. Yao" mang wa AsAng ngaid: ra". Yao" qhid' kheim: mae ngaui bau: zhao: yao: na ge,.5 Mo"so wa yao" shaogyang" ra" jo, qo mae na: jo, mung: cug' zo: nau" qe: yao: pho" cug' mo" qe: thao de, mung: dao: phyid' byid' ra".6 Mo"so wa yham dang: ug' khug' maqo" mo, re yham dang: ug' khug' vai" byid' ra''. Kyam: lhaung" qhug' mo, re ngaui bau: ngaui lho" nhao: ra". Ngaid qere: gin jang kaung: kag' mo, kam" wa din" pyaid' yo mae na ca" li''genae".7 Mo"so we" ni" byumyu" qe: qhid' kheim: mae thug' ye; li" mung: seyo mae su" lhang" qin" au: mug: myid laui" nain" li" mung: mug: gaung wa Mo"so qhid kheim: mae yug: na: ra".8 Israel qe: Mo"so: qhid' kheim: mae Sina' bam re: laui" nain" na: ra".9 Mo"so we" AsAng wa mug: mo" thaui: qu: khyo" nhao mung: jhoe' kyaug' lo" va" ni" khyao kham khyao khae: byu jham re bao" thaug' yu: ava".10 Mo"so we" ni" mo, mo" thaui: wa jo, qo qo" mung: na: bam veko". AsAng wa myaung: sho: mo; tau: na gai ye, gai jao: nyhang" byid' ava".11 Mo"so wa mung dao: khyo" ke' mung: ngaui bau: ngaui lho" lau dao: ta" hau" kyo: mo, myo: laug: lo: ra".12 Gye mo, thaui: mo" qe: jhaung zug: qe ahin akhyaid' tao" phao: lo" byaug ko" mung: yham mae na: dang: gyo" ra" myiqe: jham wa zai gyo" re jho" gae:myho" yu ko"ra".13 Naonhaung" wa yao khyae agyo: mae na nae" ang ko" re , phaung" kyug' daung re ngaui: yang thab' mung: ai: daung re hhang bo" yang shaung yhaung" to" ruru: boe" genae".14 Qam: mo" bo: ra" Mo"so wa ai: mang: mae" jhaung zug: qere khe' thug' sin" pye' ra" au: Zalamon: bam mae gyu: khyo" ruru: boe" ra".15 Bam nyaug myo: sho' bo: ra" Bashain: bam wa Mo"so: bam jham we" ,16 Naonhaung" wa myhao: ra" bam nyaug jham myo: ngaid qere: , Mo"so ab' na nae" o ngaui: ra" , Mo"so malam: lai: na nae" bam re pe" mung: myo, jhin" qu" na ko" i"?.17 Mo"so: gye khe' lhin" jham wa ataung atug myo: laug: ra". AsAng wa ai jham we' daga" ngaid: ra". Shaogyang" ra" Sina' bam re" ru: ngaid: ra".18 Mo"so ai: jo, qo mae na: na nae" tau: myhao: ra" jo, qo khyo do, lo" mung: byu myo: sho' re sham" tai: pyaung" lo" mung: Mo"so wa byu: akhug mae ab' na nae" akhyo byu qe: tau: za: maka" kaung: kag' tug' lhang: ke' mo; tau: mae" jhaung qhu" re qo" khae" yu: ra".19 AsAng wa pyaid daedu nga: lho" na veshao: wo". Ngonhaung" re supe" pyam" yhin" ko" ra" au: Mo"so wa khyaid' khyi: yu: ra".20 Mo"so wa ngo nhaung" re qo" khyaid' yu yaug ngaid: ra". Mo"so wa shid: ra" khyo dang re re: sang: ci yaug ngaid: ra".21 Mo"so wa yao" gyevo jham: au: rere: qobo mathang mathang kaid' na: ra" mo; au: zaung rere: dang dang yao: be; kho' pye' byid' li" nae".22 Yao: bam re Bashain: mang: mae" ngo jhui" yu shi: nae". No; thao" ra" qid dae mo" mae" re: ngo jhui" yu shi: nae".23 Ai: ra" khyo" yang nao wa gyevo qe: sa: mae nao: mung: ni" lakha: jham re: yo; li" genae" ga: Mo"so mho: ra".24 Mo"so we" shaogyang" ra" jo, qo khyo AsAng gyo" li" ru nga" AsAng nga" AsAng jhaung zug: gyo" li" rure the' myao: bam va".25 Nghaui" caung: nghaui" mo, gau: qhid' she mung: , thao mae tang: aja: ja: she maid mo, cao" mung: jhe' cang" be; ra" zomyi: jham wa agaung: mae cao" ye" lo" ko" ra".26 Israel amyu" zo: qe we" volo mo, phaung mae Mo"so re min gam byid: ge, wo".27 Ngai: thao" ngaid qere: yao: bam re ug: Benyamin: we' Yuda amyu" nhag' bo ade, qe wa yao: bam: mo, thaui: we' daga" ai: thao mae wa Zabulun: we' Nabthali' zug: ade, qe boyain" ye: ko" ra".28 Mo"so we" ni" kheim: so' qam: o: re ci: qhu" byid: la,. Mo"so we" ngonhaung" mae byid' to" jeju gang" tang: jo, veshao:.29 Yerusalem: mae jo; ra" pa" jhaung: yham tau: mae jhaung zug: qe wa AsAng jhao" jhaung qhu" xeim: jham ci: li" vege- shao: wo".30 Je: jid: yo mae" myang kha: zoqhid jham nung: jaung phung: we' byumyu" qe: nung: jaung nau" , ngaui thaung jham ci yang: li" goe; pa" vegeshao: yao: bam re qeim: ke' wa,. Gye mau" re o ngaui mo, re pyo: sin" ke' wa,.31 Egutu mang: mae" logyo: qe joe" lo: li" genae". Ethiopia wa Mo"so jhao" yao" lo, re hin hin yheim" qang geshao: wo".32 Myid gaung: dao mae" mang: din" jham we" Mo"so: qhid' kheim: mae nghaui" thoe nghaui" caung: ge, wo".33 Getam: geto mae" mug: gaung re jui" ra" yaug re nghaui" caung: ge, yao: wa thoe mo" ke' mung: zag: hug' ke' ra".34 Mo"so wa phung bao ham" hung: qi" ra" ein: khae: yu ge, wo". Israel amyu" re phung bao nghoe' gam zo" re" phung bao wa jham phyu thaui: mae bao bao za: jo; jo; ra".35 Mo"so we" AsAng wa shaogyang" jo, qo taung gaung mae gyaug pho: yao: ngaid: ra". Israel amyu" qe: Mo"so kam" wa yao" byumyu" re kheim: so' qam: o: byid' ra" Mo"so ngaid: ra". Mo"so AsAng wa nga: lho" na veshao: wo".