1 Nga" AsAng Mo"so we" ngo AsAng mae khug ngha: na: wo". Ngo re pyam" yhin" ra" mo; lo, mae" ngo re khyaid' lhoe' yu la, wo".2 Ai re" ru:she: yu: yaug mana: ra" au: gyevo wa lo: tin: re" ru: nga" nhag' lam: solo re kya' she: yu: lo" li" genae".3 Nga" Mo"so we" ngo ai: au: zao" kaid' ngaid: re , mangaid: lao" nga" lo, mae qobo de; ngaid: re ,4 Mangaid: lao" ngo we' nyang va" ra" yaug re ngo the' shaid' mung: akhyo mamyao: ru gye lag: lag' yaug re zao" pyam" ru qobo daja: ja: jo; ngaid: re ,5 Gyevo wa nga" nhag' lam: Solo re cao" khe' myhi veshao: nga" kao re zab: zag; ci mung: nga" nga: lao: re phaui: lhug bam mae nao" te' to: veshao:.6 Mo"so we" nhag' yo" myo, nho we' thug' lo wa, nga" gyevo jham nhag' lam: laung ko" rure tug' pye' byid: la, Nga" akhyo re myid: beim: mung: dao: li" phyid' byid: la,.7 Byumyu" qe ham phaung mung: AsAng re lhang" kham" zo" re" yao: bam: tau: mae myhao: ra" jo, qo khyo do, lo" byid: la,.8 Mo"so byu qe re dao: phyid' byid' ra". Mo"so we" ngo mae bo: ra" dang main" ru we' nhag' cao jab: rure tau yang: ngo re dao: phyid' byid: la,.9 Makhyang" ra" mo; mau" zo" re seim" pye' nhao mung: dang main: mo; mau" re kam" wa zhaug' tang byid' ra". Jo main" ru re qu" kin byid' ra" Mo"so wa sang: mae kheim mae re: ca: kin: na: ra" yaug ngaid: ra".10 Nhag' lam: din" ra" mo, re khyaid' yu: ra" Mo"so wa nga" go ngaid: ra".11 Mo"so wa tarha" din" ra" khyo" dao: phyid' yaug ngaid mung: tarha" macao" ra" mo, re khoau: re: nhag' yo" na: ra".12 Ai: yaug wa matha" lhang: lo re yao" tau: shae saui" to" ava". La: re: thaung: qang: to: va" ra".13 Gyai shid nhao: ra" sin: re: yao" tau: mae seim" nyhang" mung: myo: khe' jham re jhao" to: nhao va" ra".14 Ai: yaug wa qobo khau no no: phau: mung: magai: ra" tau" da gaung la: mung: mhug' vhain" rure khau myhung: ke' ra".15 Dung: gyain: re no, sho' dau: mung: ai yao: dau" ra" gyain: mae yao: gyo" ra".16 Yao: bam tau" yaung: ra" magai: ra" tau" da jham wa yao: bam: au: dao mae dam: gyo" kai: mung: yao: bam yao" apyi ajhae kaid' ra" akhyo re: yao: bam: au: dao mae dam: gyo" be; ra".17 Ngo kam" wa apyaid ato: Mo"so: tarha" ra" mau" zo" re caung: khin" mung: myhao: thao" ra" Mo"so: mang khyao: re nga: yhe' nghaui" caung" na nae".