1 Nga" aung khug: nhag' myid alhab' we' AsAng re caung: nae". Ni" mug' pho" mau" zo" jham re ta" hau" kyo: nae".2 AsAng re khug ngha mung: ngaui pyo: zhao: yao: na nae". Myao: thao" ra" Mo"so we" ni" mang khyao: re caung: khin" caung: nghaui" na nae".3 Khoru: ein: re nga" gyevo jham naung zaid: zaid' lo" yang: AsAng: qhid' kheim: mae tha" lang: byo; qeim veko".4 AsAng wa nga" thao de, mung: dao: phyid' va" ra".Dang main" ra" tarha" agyi nao ngaid mung: la kin dao mae zaung: na: ava".5 Taung bug byumyu" qere mho" shid' ava". Makhyang: mo, re phyo' qheim" khyo" pye' mung: yao: bam: mang re pyaid da du mae phyo' pye' ava".6 Gyevo qe wa gain sho' gyang: byaug veko". Vogaung: jham rere: phyo' sin" pye' va" mung: so: xam: jao: lao" majo, lo: ngaid: ra".7 Mo"so wa gug: mang: dae gam: na: na mung: tarha" dao: phyid' nae" tao" myhao re: nyhang" to: va" ra".8 Yao: wa myid kin re dang main" ra" khyo" dao: phyid' na: ra". Byu qere dang main: taung" tarha" dao: phyid' ra".9 Mo"so wa pyam" yhin" qhug' mo; khug ngha jao: qug: khai: thaung" qhug' ra" ba khug ngha nae" jao: ngaid: ra".10 Ni" mang khyao: re ba: ra" mo, wa AsAng re lam khug: lo: li" genae". Pe" mung: ga" re Apyaid ato: Mo"so we" AsAng wa nao re qho mo, re shelhaui" to: yaug mangaid: ngaid: ra".11 Ziun: bam dao mae na: ra" Mo"so re caung: nghaui" na ge,. Yao" mau" zo" re byumyu" cao jab ba geshao: hau" kyo: ge,.12 Byu: kao se' mau" re ca: qu" byid: mung: shid qhug' ra" mo, re myid: beim" na: ra". Nyham: khyo" ra" mo; mho' yao thoe gyo" yu byid' ra".13 Mo"so we" ngo re nhag' myain" ru we' khyi: yu la, , ngo re gyid' ra" mo; pyam" yhin" ra" mau" zo" re qu" mung: shid zug' lo, mae" ngo re khyaid' lhoe' yu la,.14 Airu: lao" ni" jeju re Ziun: vomo" kham: dung: mae ngo qu" nae". Khyaid' yu: ra" jeju mathao mae ngaui bau" na nae".15 Labug amyu" qe wa yao: bam dau" ra" dung: gyain: mae gyo" veko". Yao: nyham" khae: to" ra" taui: mae yao: bam zab; myi" veko".16 Mo"so wa dao: phyid' ra" khyo" yang yao" gaung re qhu" byid' na: ra". Makhy- ang: mo, kam" wa yao: bam kaid' ra" vo" mae tha" lang" gyo" ru phau: veko".17 Makhyang: mashab mo, we' Mo"so re mabeim: maso: na mo, alhab' wa movo: mug: khyo khe' khyo" ke' ru qhug' genae".18 Sho: jhin mo, re khonhae" re: to" myhid' nae" mangaid: Qug: khai" ra" mo, myid: nghae" jao: maqo" genae" mangaid:.19 Mo"so we" to" li" byid: la, su: yang mali" aung: pye' geshao: Labug byumyu" qe ni" qhid' kheim: mae dao: phyid' ru qhug' vegeshao:.20 AsAng Mo"so we" yao: bam re kyaug' nhin" ke' wa, Alao" za: yao: bam wa shid main: qi" ra" mo, ngaid: rure yao: bam ba: li" genae".