1 Mo"so we" pe" mung: nao va: mae na nhae"?. Qug: khai: thaung" qhug' ra" ayo, joe" mung: gug' na: i?.2 Makhyang" ra" yaug ngaid beim" nhag' myid bo mung: myaung sho" ra" mo, re pyam" yhin" ra" yao: bam thaung: ra" lha" mae yao: bam myi" yu veko" ra".3 Makhyang" ra" yaug wa yao: myid: yaung: ru mae ngaid beim" ra". So' kho' myo, no, yaug wa Mo"so re ha: pye' mung: gaui qu" shao" pyao: pye' ra".4 Makhyang" ra" yaug wa ngaid beim: so" ru: yang maba: myid: qu" ngaid: ra". Mo"so mana ga: yao" nhag' myid mae abo: na: ra".5 Tarha" dao: phyid' ra" thao tae wa yao: we' gyai va" lin: byaug mung: gyevo alhab' seim" re pe" shui manho ngaid: ra".6 Ngo wa gyo" seim" nae" mangaid:, qug: khai: phau: nae" mangaid: ga: jho: ra".7 Yao" nhaid' sho wa nhang" ru , nhin" ru , khyoe' ru za: ata" ra". Yao" sho gyid' mae" magai: ra" tau" da mau" za: athug' li" ra".8 Vogaung: yae mae vho' na: jo, mung: qobo maqo" ra" mo, re khug' se' pye' na: ra". Sho: jhin qug: khai" ra" mo, re lao" jhug' qu" qin" ra".9 Thao" jam" mae" lo: tin: re" ru: vho' gug' na mung: sho: jhin mo, re yao" myho: yang cam" mung: myhag' yu: ra".10 Ai re" ru: pyam" yhin" ru qhug' mung: sho: jhin mo, alhab' yao" lo, khug khyo vao lo" ko" ra".11 Ai: yaug wa Mo"so re mabeim: maso: ngaid: ra". Yao" myo, khung: nyham" pye' ra". Mo"so the' myao nae" mangaid: ga: myid: jho: na: ra''.12 Mo"so we" to" li" wa, AsAng we" ni" lo, tau: qang: ke' wa, nhag' myid nyham: khyo" ra" mo, re dato" myhid'.13 Makhyang" ra" yaug wa pe" mung: Mo"so re gaui qu" na: i?. AsAng wa qug: khai: kyin" nhaung"ru qhug' myao nae" mangaid: ga: pe" mung: myid: jho: na: i?.14 Ngaid qere: AsAng wa the' myao: ava". Pe" mung: ga" re myaung: dug: ru we' kaung: kag' rure pyao" pye' nae" ga: qu" na: ra". Myaung sho: mo, yao: yao" gaung Mo"so reqhaug' byid: ba ko" ra". AsAng wa myhi" pho" maqo" lo" mo; khug ngha jao: ngaid: ra".15 Makhyang: mashab: ra" mo; lo, re nag; khyug' pye' byid' ra". Yao: bam shaid' nghung" rure ca: qu" mung: qobo dae byid: wa,.16 Mo"so wa malam: lai: gang: tang: ra" jhaung zug: ngaid mung: labug byumyu" qe wa ai: mang: din" mae byaug: seim" thao" li" genae".17 Mo"so wa nyham: khyo" nhag' myid bo mo; mho' yao thoe re gyo: byid' ra". Yao" nhag' lam: re lhaui" tang byid' ra".18 Myaung sho: mo, re myid gye, mae" makhe' thug' pye' nae" tau: cug' zo: qe we' yhin" qhug' ra" mo, re khyo gai ceim" shid' nae" ga: no: khae khae: na: ra".