1 AsAng we" nga" dao: re tae" gyo" yu mung: ngo myid: tau" sun" qu" na: ru re beim" na wa,.2 Nga" Jhaung zug: nga" Mo"so we" ngo mho' yao thoe gyo: byid: la,.3 AsAng we" ne, seim no' no' mae" nga" jhaung: mo' thoe re gyo: byid: la, AsAng re au: am: myid: nghae" na nae".4 AsAng wa magai: ra" mau" re o ngaui: ra" Mo"so mangaid:. Makhyang" ra" mo, re khae: yu: ru mangaid:.5 Makhyang: mashab yaug wa AsAng jhao" maqo" te' vao ye:. Airu" mo, re Mo"so gyid' ra".6 Mhug' vhain" dao: jhau mo, re phyo' qheim" pye' na: ra". Byu se' ra" mo, we' pyag' sham" ra" mo, re AsAng qu" ca' pye' ra".7 Ngo kam" wa qi" ra" jeju mathao mae ni" jhaung: yham mae qo" goe; pa" caung: khin" na nae" ngaid:.8 AsAng we" nga" gyevo qe: mathao mae ngo re gai: ra" khyo dang gau: khyo dai" byid: la, AsAng: khyo dang re nga" qhid' au: mae din: za: jhao" ke' byid: la,.9 Yao: bam: nhaid' mae dao: so: madang ko". Yao: bam: khyaung: wa phung" to" ra" mang: khung: ngaid: ra". Yao: bam wa nhaid' sho: yang ba: jhu" zo" ako".10 AsAng we" yao: bam re qobo dae byid: wa, yao: bam: tau" da mae tha" thu: lang: vegeshao:. AsAng re tau: lhain: ko" mo, ngaid mung: shid nae" qobo myo" laug veko" mathao mae khe' thug' pye' wa,.11 AsAng re lam khug: ra" mo, kam" wa ngaui bau: vegeshao: wo". Gug: gam: ru qhug' khae: yu mo, wa ngaui bau: taung" qhug' yao: na vegeshao: wo". AsAng: mang khyao: re jhid' de, mo, wa ngaui bau: zhao: yao: na geshao: wo".12 AsAng wa dang main: yaug re min gam byid' na: ra". Jeju khyo" gug' gam: ru byid' li" nae".