1 Mo"so we" Ziun: mae AsAng re caung: khin" mung: nao re byid' to" ra" dao: so: re cao" pyang" nae" gai: ra".2 Jhaung: mho' thoe re tae" gyo" ra" Mo"so we" byu alhab' wa AsAng jhao" qui" te' lo: li" genae".3 Makhyang: mashab: mau" ngo re aung: lo ngaid qere: AsAng wa ngonhaung" qobo re nghoe' to: byid' ra".4 Vo kham" khug mae na mung: AsAng jhao" tin: te' li" nae" tau: AsAng khyin: yu: ra" yaug wa nga: lho" ra". Ni" shaogyang" ra" pa" jhaung: yham we' ni" yham mae" zai lho" ru: yang ngonhaung" na: gai: li" veshao: wo".5 Ngo nhaung" re khyaid' khyi: yu: ra" Mo"so we" jhaung: mho' thoe re tae" gyo: mung: mug' pho" ra" mau" re qu" byid: va". Va" ra" mug: myid athao" mae" we' qid dae mo" yae na mo, khug ngha qo ngaid: ra".6 AsAng wa kheim: so' qam: o: byang" vin" mung: bam mo" bam zo: re lhaui" tang: yhe' to" ava".7 Qid dae mo" myang: hau" ru , bang: lhung" thoe we' byumyu" qe hug' yhai: na: ru re qo" tam" pye' ra".8 Airu: mung: va" ra" jo, qo mae na: ra" mo, wa AsAng: ve, lho jham re myao mung: gyaug ko" ra". Ba thug' ba vao jo, qo jham wa ngaui bau" na ko" ra".9 Myid gaung re nao cao" kam" qu" mung: mug: qu: tag' byid' ra". Nao re jin" myo: laug sho' ke' byid' ra". Mo"so: qid mo" lao jham qid we' zaui" pyang" byid: mung: gaugzo jham re yhaug' byid' ra".10 Yo phaug' jao: re jhug' dag nhao mung: phaug' sin" to" ra" zhai: khyi" jham re be; te" byid' ra". Mug: qu: sheim: byid: mung: au" nheim" nyha, byid' ra". Yaug: li" ra" agae jham re min byid' ra".11 Nao wa zin qug: re ni" na gai: ru we' zaui" pyang" byid: mung: ni" khyid khu mae" xau yug: thug' na: ra".12 Seyo mae" gyo, zo: jao: mae re: yug: na mung: bug gaung jham ngaui bau: ngaui lho" ru phyid' cui: cui" li" ko" ra".13 Din" yo gyo, zo: jao: mae yao caid' be, jham byang" ug: na ko" ra". Lao: khaung: mae gaug zo byang" ug: jo; ra". Ai jham wa hug' yhai: na ko" ra". Ngaid va" nghaui" thoe caung: thoe nghaui" zo" re" na: bam ko" ra".