1 Mo"so wa nga" Mo"so ngaid: ra". AsAng re no' no' cao" qho va". Qid majo; ra" gaosao yo mae nga" solo wa AsAng re moe, shab' na:. Nga" gaung sho: re: AsAng re myid: lao" na:.2 Ni" qam: o: we' phung bao re the' myao nae" tau: shao gyang" ra" yham mae ngo AsAng re myid: lao" na:.3 Nhag' myain" ra" jeju wa kao so' tho' je: phug' de; ra". Nga" nhaid' sho thoe: yang AsAng re caung: nghaui" nae".4 Daui: na shi" au: ngo AsAng re nga: yhe' na nae". Ni" mang khyao: we' nga" lo, re tau: to' nae".5 Nga" yab jaung: dao mae AsAng re myid: beim" na mung: myi" gae gaung: ayo, mae nao re myid: nghae" qu" na:.6 Nga" solo wa xau thaung mae xau: ra" sho: re" ru: gyi" byaug mung: ngaui bau: ngaui lho" ra" nhaid' qid we' nga" nhaid' thoe: yang AsAng re caung" na:.7 Ngo re bao" yaug wa AsAng ngaid: ra". Ni" daung fo' khug mae ngo khug: na nae". Ni" lo, yo lo; yang ngo re bao" thaug' na: ra".8 Nga" kao so' re phyo' qheim" nae" tau: myid: ra" mo, myid gaung khug khyo gyo" ca" genae". Shae mae shid mung: zagne jham: zo boe" genae".9 Jhaung zug: pho" kam" wa Mo"so mae ngaui bau" li" nae".10 Mo"so: mang re lao: mung: dao: so: to" ra" mo, alhab' wa bau" nghao" li" genae". Mhug' hab' qe: nhaid' re kam" wa jhid' pye' ru qhug' genae".