1 Nga" Mo"so we" gye she mo; lo, mae" ngo re xoe: yu la,. Nga" gyevo jham: khug mae" ngo re gug: gam: yu la,.2 Makhyang: mashab: mau" kaid' ra" jao: mae" ngo re xoe: lhoe' yu la,. Byu se' mo; lo, mae" ngo re khyaid' yu la,.3 Ngo re se' nug yang: yao: bam ngo re kung" na ko" ra". Ngo re phyo' qheim" nae" ga: qam: bo mo, ham phaung: na veko". Ngaid qere: Mo"so we" ngo qobo made, qobo re: makaid' ru ngaid:.4 Ngo mae pe" qobo mabo: ru yao: bam khe' tao" li" mung: gye she ko" ra" . Ngo re bao" yu nae" tau: to" li" wa, , li" qu" gam: yu wa,.5 Israel amyu" Mo"so: gug: mang: dae gam ug Mo"so we" byumyu" cao jab re li" qu" kam: nae" to" li" wa,. Mashab makhy- ang" ra" gau: khyo cao" mo, re nhag' daqu" myain:.6 Yao: bam myi" thao dam: tug' lo" mung: lakha: re"ru: kyid' mung: vovai: voyae mae su" lhang: qin" ako".7 Yao: bam re jung" khyoe' ra" dao: jhau mung: yao: bam: nhaid' qid mae shae bo: ra". Yao: bam wa khag' ba genae" mangaid: ga: ta" ko" ra".8 Ngaid qere: Mo"so wa yao: bam re qu"qi mung: labug byumyu" qere jung" pye' ra".9 Nga" qam: o: we" AsAng re myid: nghae" na nae". Mo"so wa nga" khug ngha jao: ngaid: ra".10 Nhag' myain" AsAng wa ngo re bao" nae" tau: gyo" lo: li" nae". Nga" gyevo jham byo, qeim: lo" rure the' myao nhao: li" nae".11 Mo"so we" yao: bam re dase' pye' byid: la, se' pye' ngaid: re nga" byumyu" qe to" myhid' pye' li" genae". Ni" kheim: so' qam: o" yang khyi" khao: ngo" khyo pyo: sin" ke' mung: deim" zag: khyo" pye' wa,.12 Yao: bam: nhaid' mae" qobo we' nhaid' qid mae shaid' ra" dao: yao: bam: nhang: myain" nhang: thoe we' mhug' dao: ta" ko" mathao mae yao: bam ngaid beim"ru mae myi" ru qhug' vegeshao:.13 Nhag' gyid' ru: yang yao: bam re zai" kain" pye' wa, yao: bam maqo" gai: na lo: sho' zai" kain" pye' wa,.14 Yao: bam myi" thao: dau dam: lo mung: lakha: re"ru: kyid' zo" re" vovai:voyae su" lhang: gam" qin" ko" ra".15 Zo: nam qho zo: du" qin" ra" lakha: jham gyi: sho' maqhug' zo: mung: kyid' myang: na: ru ngaid: ako".16 Ngo kam" wa ni" qam: o: re caung: nghaui" na nae". Ne, seim mae nhag' myain" rure zhao: yao taung" nghaui" thoe nghaui" na nae". Khoru: ein: re AsAng wa qug: khai" ra" ayo, mae khug ngha noqo ngaid: ra" mathao mae qug: khai: loe, jao: re: ngaid: ra".17 Nga" qam: o: we" AsAng re nghaui" thoe: yang caung: nghaui" nae". Mo"so wa nga" khug ngha qo ngaid: ra". Ngo mae nhag' myain" ra" AsAng ngaid: ra".