1 Mo"so we" ngo re nhag' myain" yu la, Byu qe wa ngo re myug: pye' nae" seim" na ko" ra". Daba gyam geim" kaid' ko" ra" mathao ngo nhag' myid myo" na: kyi:.2 Nga" gye jham wa ba geim" kaid' na ko" ra". Ngo re khe' khyaid' zin" na mo, myo: laug ko" ra".3 Ngo gyaug: din: ra" ba na mae nga" AsAng mae khug ngha: na: ,4 Ngo Mo"so re lam khug: na mung: magyaug yao: byid' to" ra" dao: so: jo; ra" mathao mae yao: re ngo caung: khin" ra". xaosu byu za: angaid mo, ngo re pe" qo" kaid' genae" i"?.5 Yao: bam wa ne, khao: ngo" nga" dao: lhau: said' pye' ako". Ngo re magai: ra" khyo" za: myid: yaung: na ko" ra".6 Yao: bam wa vho' jo, qo mae ham: na mung: ngo re se' lhang" lhang" mung: nga" khu bye re jhug' qu" na: ako".7 Yao: bam makhyang: mashab: mau" mathao mae loe, beim nae" akhyo mabo Mo"so we" yao: bam re nhag' gyid' ru: yang lang" gyoe; gyo" lo" nhao: ,8 Ngo lae" su" lang" qin" rure nao xam" to: gau ngaid: ra". Nga" ngug byid re ni" thaug' bain: mae qaung" to: wa,. Ai jham wa ni" japhin: paug' mae bo: bam va" mangaid: i"?.9 Mo"so wa nga" bo: de; ra" mathao mae ngo zag: yao: ke' ra" au: nga" gyevo jham naung zaid: zaid' lo" byaug genae".10 Mo"so mae ai: mungdao: re ngo caung: khin" ra". AsAng mae ai: mungdao: re ngo caung: khin" nae".11 Mo"so mae khug ngha: na mung: pe" rere: magyaug ca" lo: , Byu za: angaid mo, ngo re pe" qo" kaid' genae" i"?.12 Mo"so we" ni" qhid' kheim: mae dao: so: to: mung: dao: so: re cao" pyang" zo" re" caung: khin" nae".13 AsAng wa nga" kao so' re byid' ra" jao: mae" khyaid' lhoe' yu va". Daui: na mo, mug: bo" lao" Mo"so: qhid' kheim: mae su" qin" nae" tau: mae nga" khyid tha" thu: lang" ru mae" nao tau: yu byid' ra" mangaid: i"?.