1 Mo"so we" ngo re nhag' myain" yu la, nga" nhag' myid nao mae khug ngha: na: ru mung: ngo re nhag' myain: la, Ai: lhau: phyo' lhau: qheim" ra" mae" lai: lo" sho' ni" daung fo' qab mae ngo khug: na nae".2 Ngo wa myhao: thao" ra" AsAng ngo re ja: khao: ngo" nyhang" byid' ra" Mo"so re zag: yao: khai nae".3 Mug: gaung mae" lo, yheim" qang: ke' mung: ngo re deim" zag zo: nae" ga: mo, re qho' phyo' byid: mung: khyaid' yu: li" nae". Yao" nhag' myain" ru we' dao: so: re nhao: ke' byid' li" nae".4 Nga" solo wa lo:tin: phaung mae na: na:. Nhag' lam: laung: nga" na: ra" byu qe: phaung mae yab ca" ra". Yao: bam: zaui wa lhae taid' we' myo: khe' ngaid ko" ra".Yao" nhaid' sho re: tho' ra" shae ngaid: ra".5 Mo"so we" mug: gaung myhao: ra" tho' mae" nao je: myhao: ra". Mug: myid dagye, geim" re ni" phung bao byang" ug: na veshao: wo".6 Yao: bam wa ngo ye" lo" nae" khyodang mae lha" thaung: to" ako". Nga" nhag' lam: gyug' byaug; kyi: va". Yao: bam nga" tau: mae dung: gyain: dau" to: ko" ra". Ngaid qere: yao: bam dau" dung: gyain: mae yao: bam gyo" vao lo" ako".7 Mo"so we" nga" nhag' myid gang" tang: na:. Ngaid va" nga" nhag' myid malam: lai: gang" tang: na:. Nghaui" thoe we' caung: nghaui" na nae".8 Nga" solo we" beim: gyang: to" li" wa,. Nga" she tang: we' pag' tang: we' beim: so: ge, ngo re: no' no' to" nae".9 Mo"so we" ngo wa volo mo, mo" phaung gaung: mae AsAng re caung: khin" nae". Byumyu" qe: phaung gaung: mae AsAng re caung" ra" nghaui" thoe we' caung: khin" nae".10 Khoru: ein: re ni" nhag' myain" myid mug: gaung joe" sho' , ni" jhaug' zaug: ra" dao: so: wa jham re myhi: ra".11 Mo"so we" mug: gaung myhao: ra" tho' mae AsAng wa je: myhao: na veshao: wo". Mug: myid dagye; geim" mae phung bao wa nghoe' gam: na veshao: wo".