1 Mo"so we" nga" jhaung: mho' thoe re gyo: byid: la, ngo mho' yao: na: ru mae" nhaung thao" daphaug' pye' byid: la,.2 Ngo re qu" xam: mung: tau: byid: la,. Gyevo qe: dao: thoe: yang re: , matarha" pyam" yhin" ra" mathao: yang re: , ngo nhag' ngai: ru we' kaug' myain" qhu: thoe mung: na: wo".3 Yao: bam wa ngo re qobo zhaug' mung: nhag' yo" gyid' ru we' ngo re nhang" ako".4 Nga" nhag' myid wa aung khug mae nin" laui: mung: shid nae" rure gyai gyaug: ra".5 Gyaug: ru we' cug' cug' nin" ru ngo mae boe" na va".6 Ngo wa phaung" kyug' ru: daung de; qa: we". Ai re"ru: daung de; ngaid: re getau khyo dao" lo" mung: yaug yo za: na: lo" nae".7 Va: va: khyo joe" lo" mung: seyo khain mae khug: na nae" ngaid:.8 Mug: qu la qam" mae" loe, nae" tau: khug ngha jao: khyo phyaid phyaid tao" phao: lo" nae" ein: myid yang: ta"na:.9 Mo"so we" ai: vo gaung: mae se' da: be, khyaid' lhaid' zo: lhaid' shaug' kaid' na ko" ru re ngo the' myao va". Yao: bam: dao: thoe re lhau: said' byid: mung: byo; sin" lo" nhao wa,.10 Myi" na" vokham" dao mae su" lhang: qin" ko" ra" vo khug mae" makhyang: mashab: mau" qug: khai: kyin" nhaung" re: byang" jo; ra".11 Makhyang" ra" mau" wa vokhug mae byang" jo, mung: hau" mo" khyo dang mae byu yao: cao: deim" zag zo" ru we' jho" mhug' sham" zo" ru byang" jo; ra".12 Gyevo: yang ngo re jung" ngaid: re ngo qo" zang: qhao" nae". Ngo re gye kaid' ra" yaug wa ngo re manug: ra" yaug ngaid: re yao: re ngo qo" jao" pye' nae".13 Nao kam" wa ngo re" ru: ngaid mung: nga" byin zam" cao:,nga" ba nam ngaid: ra".14 Nga" shid' yaug wa te' dai" jho" jhau: keim" mung: volo mo, zhain we' daga" Mo"so: yham khyo lhaung" cao: ye: va".15 Yao: bam re shid zug' yang taung" jhui" lo" vegeshao: wo". Adaui phe, phe, movo: mug: khyo gyo" vao lo" vegeshao: wo". Yao: bam: na jao: mae re: nhag' myid khug mae re: makhyang" ru za: bo ko" ra".16 Ngo kam" wa Mo"so re bao" yu nae" mho' yao mung: Mo"so wa ngo re khyaid' yu: li" nae".17 Ne, seim , na" gaung we' myi" ayo, mae ngo myid: qug: no kyang: kyang: thoe re yao: tae" gyo: byid' li" nae".18 Ngo jhao" ajhao" za: joe" li" mung: mang: khaid' na: ru mae" yao: nga" kao so' re gug: gam: jhui" yu: li" nae".19 Getam: geto mae" ug: lo: ra" Mo"so wa ngo re gyo: byid: mung: yao: bam re wa jeim" gyoe; gyo" lo" nhao nae". Pe" mung: ein: re yao: bam malai" li" qaid ko" ru we' Mo"so re maba: gyaug phug' ko" ngaid: ra".20 Ai ru" ra" yaug wa ba nam re lham: khaid' mung: yao" dao: so: re lhau: phyo' pye' ava".21 Yao" nhaid' dao: thoe wa xau ru: nyhaid' ngaid qere: yao" nhag' myid mae gye she nug: ra" myid bo: ra". Yao: ta" ra" dao: thoe xau re" ru: nhae" ngaid qere: ai wa she: thug' to" shae ru: ngaid: ra".22 Ni" qo la: Mo"so: dao mae vo; kai" ke' wa, yao: nao re thaug' qhao: byid: nae". Kho nhae" re: dang main" ra" mo, re lang: be, nhao nae" mangaid:.23 Mo"so we" getau: mo, byu qere byo, qeim: ra" dung: khung: khyo khyo" pye' nae" ngaid: ra". Byu se' mo, we' mhug' pyag' sham" ra" mo, re kao agaung: kho' lao" na nhao nae" mangaid: Ngo kam" wa AsAng mae khug: na nae" ngaid:.