1 Mo"so we" ni" jeju we' dakhyo: ngo re nhag' myain" yu la, mabaui mabyo; ra" nhag' myid we' nga" qobo re khyaid' pye' byid: la,.2 Nga" makhyang: mashab nyain: vho: ru alhab' re cid' pye' byid: mung: nga" qobo mae" ngo re kyang" shao: yu la,.3 Ngo shaid' nghung" ra" qobo re ngo beim: so: va". Nga" qobo re khonhae" re: myid: beim" na:.4 Ni" mungdao: wa dang main" ra" ni" tarha" dao: phyid' ru mae qobo kaid' va".5 Ngo wa khau: li" ba mae" qobo qo" gau khau: li" , myhi" aung khyao xao" mae" yao: qobo de, gau ngaid:.6 Nhag' lam: phyu: ru we' dang main" rure nao o ngaui mung: nga" nhag' myid khug mae ni" juyi ke' byid: la,.7 Ngo re fin" bau: dang" yang shao kyang" byid: la,. Gyu: tho' je: phyu nae" tau cid' shao: yu la,.8 Nao khyug' mhain" byid' ra" shoqug: sho qae jham dam: ngaui bau: vegeshao: No: gyo: yo: ra" dao: kyo: byid: la,.9 Ngo zai" lhoe" shaid' ra" qobo re daqhu" byid: la, nga" makhyang: mashab: ru alhab' re shao byid: la,.10 Mo"so we" nga" aung khug mae shao lho" ra" nhag' myid ke' byid: la, jhaug' zaug: ra" agin asag' re ke' byid: la,.11 Ngo re ni" myo, qao: tae mae" dakhe' thug' la, ni" shao gyang" ra" Solo re ngo mae" dayu: pye' byid: la,.12 Ni" khyaid' yu: khyo ngaui bau: ngaui lho" ru ngo re dam: byid: la, Lam ga" ra" nhag' myain: nae" myid ke' byid: veshao: wo".13 Alao" tarha" macao" mo, re ni" mung- dao: mho" shid' kyang: nae". Yao: bam nao jhao" dam: lhang: tug' lo: li" genae".14 Mo"so we" ngo re khyaid' yu: ra" Mo"so we" xao au: gyoe laug: yug: no mae" ngo re lhoe' yu la,. Alao" nga" nhaid' sho ni" dang main" ra" khyo re zag: yao caung: nghaui" nae".15 AsAng we" nga" nhaid' re phung" byid: la,. Alao" nga" nhaid' sho nao re caung: nghaui" nae" akhyo yo: kyo: nae".16 Kug' ngaui" xeim: re nao o ngaui: ru mangaid:. Aimung: nga" ngaui" xeim: rere: nao ma o ngaui ngaid: ra".17 Mo"so o ngaui: ra" kug' ngaui" xeim: wa gyug' main" ra" nhag' myid ngaid: ra". AsAng wa gyug' main" nhag' myid re lham: ha: pye' nae" mangaid:.18 Ni" mabaui mabyo; nhag' myid we' Ziun: re gai lho" ru kaid' wa, Yerusalem: vokham" re dam: zao: to: byid: la,.19 Alao" nao wa dang main" ra" ngaui" xeim: phaid' hab' ngaui" ru we' xeim: , gaung geim" qhug' ra" xeim: lham: qu" ngaui: li" nae". Ni" xeim: ngaui" phain mae nung: jaung lo: jham re qhaug' ngaui" byid' li" genae".