1 Byumyu" cao jab ce re tae" gyo" yu ge,, mug: myid: xaosu byu alhab' tae" gyo" yu ge,.2 Zug: qe cug' zo: cug' mo" qe jo, nho" qo" mo, myaung mo, alhab' gyo" yu ge,.3 Nga" nhaid' mae" juyi dao: ci qhu" nae". Nga" nhag' lam: khug mae ba jhao se" ru we' tin: yang: myid: phaid' na nae".4 Nga" no: khye' dao: tau" re the' gyo: nae" ngaid: ra". Tang: be, yang vai: sham" dao: re yo: kyo" na nae".5 Qug: qe" ra" ayo, mae makhyang" ra" mo, nga" zai yo re lhaid' yu nug: ra" mo, lhang" gam" lo ko" qere: ngo pe" mung: gyaug ca" nae" i"?.6 Yao: bam wa yao: bam: jo, nho" re khug ngha mung: yao: bam: jo, nho" dai kham myo: laug ru mae nga: yu: na mo,.7 Yao: bam: mao: nhaung: qere khag' maqo" khyi: yu ko". Yao: bam khyi: yu nae" aphug' Mo"so re maqo" byid: ko" ngaid: ra".8 Yao: bam: xao au: phug' saung" myo: mung: kao seim" sho' ngaid qere: matho' xe' ko" ngaid: ra".9 Khyi: tha" yu: ru wa kao daui: na nae". shid: bab; ru mae majoe" nae".10 Bao bao za: the' myao: ru kam" wa juyi ba mo, re: shid ko" ra". Ai we' dakhyo: kopyaid' qe we' gug' nyhug' nhag' myid bo mo, byo; qeim: ru joe" mung: yao: bam: jo, nho" re: su: tau: dang: gyo" jo; ra".11 Yao: bam: yham re: malam: lai: nae" jo, qo re: byu ngug xe qae: jo; jo; li" nae". Yao: bam: mang khyao: re: mug: myid: dao ham" hung: qi: nae" ga: jho: ako".12 Ngaid qere: byu wa phung bao nga: mae maqo" gang" tang: jo, byo, qeim: khyo joe" ra" gug' nyhug' we' dau: ra".13 Ai re" ru: kaid' ru wa yao: bam: khug ngha qo ngaid mung: yao: bam: zo: dau qere: yao: bam: dao: thoe re o ngaui ko" ra".14 Yao: bam re yao jham re" ru: movo: mug: mae khyo" to: mung: shid zug: wa zo" pye' li" nae". Khomyhao" mamyao" re dang main" ra" yaug ug: li" nae". Yao: bam: gaung khyao wa byo; qeim: lo" ja: ngaid mung: movo: mug: wa yao: bam: jo, qo boe" nae".15 Ngonhaung" kam" Mo"so qab: yu ra" mathao mae movo: mug: mae" khyi: khyaid' lhoe' yu: ra".16 Su jo, nho" qo" mung: dane; we' dane, je: na: dai: li" qere: nao pe" dagaung yug dagyaug.17 Ai: yaug shid: lo" lao" pe" daja: re: qo" ci: lo" zai mangaid:. Yao" myo, nho nga: lao: ham" hung: yao: jhao" qo" ci: lo" zai mangaid:.18 Ai: yaug kao daui: na: au: yao" solo re min byid' na: ra". Na gai: ra" ayo, mae su pe" yang khin" ako".19 Ngaid qere: yao: wa phug' pho" qe na: ra" jao: khyo lo" li" nae". Yao: bam khon- hae" re: mug: bo" re the' myao lo: genae" mangaid:.20 Phung bao bo ngaid qere: myid cao majab: ra" yaug wa byo; qeim ba: ra" gug' nyhug' jham we' dau: ra".