1 Qam: bo: thao" AsAng Mo"so wa mungdao: ke' ke' mung: , ba thug' mae" ba vao shaid' joe" sho' mug: myid yo so: re yao: khai: ke' ra".2 Myhao: thao" ra" Ziun: bam dao mae Mo"so wa bao: qhi: na: ra".3 Ngonhaung" AsAng Mo"so joe" gyo" li" nae" ngaid mung: , yao: sae za: magai: tae" na ngaid: ra". Yao" qhid' kheim: mae myi: nga" na: ra". Yao" avai: ayae mae aug' la qam" lo: ra".4 Yao" byu qe ca: kin: qu" nae" tau: mug: gaung re: myid gaung re: khai: zhag' ra".5 Xeim: phaid' ngaui" zo" re" ngo we' dao: so: to" ra" mo, nga" dang main" ra" mo, we" ngo jhao" ham: lo geri: ga: mho: ra".6 Mo"so yao: yao: dao: phyid' ra" mathao mae dang main" ra" akhyo re mug: gaung mae" qhu" byid' li" nae".7 Nga" byu qe we" tae" gyo: ge, ngo dao: ta" nae". Israel amyu" qe we" ngo nao re sagso: byid: nae". Ngo wa Mo"so ni" AsAng Mo"so ngaid:.8 Phaid' ngaui" xeim: we' ngaui" xeim: aja: ja" tau: mae ngo nao re qobo mavhin.9 Ni" yham mae" nung: jaung , ni" kyaung" khug mae" caid' be, lo: rere: ngo yu nae" mangaid:.10 19 Seyo mae na: ra" gug' nyhug' jham bam dataung mae na: ra" gug' nyhug' jham wa nga" jo, nho" ngaid:.11 Bam dao mae" ngho' alhab' re ngo ba: ra". Gyo, zo: jao: mae su" qin" ra" ja: alhab' ngo we' daga" na:.12 Ngo wa moe, shab' phau" re nao re kyo: nae" mangaid:. Mug: myid we' ai mae na: gu:,jo; gu: alhab' wa nga" re" ngaid: ra".13 Ngo wa nung: sho: zo: nae" i"?. Caid' be; sa: shaug' nae" i"?.14 Jeju caung: xeim: Mo"so re qhaug' byid: ge, dao: so: to" ra" we' dakhyo: myhao: thao" ra" Mo"so mae dao: so: cao" pyang" ge,.15 Qug: khai: thaung" qhug' au: ngo re jhaung: xe: mho' wa, ngo lhoe' yu nae" nao re: ngo re caung: khin" li" nae" ga: mho: ra".16 Makhyang" ra" yaug re Mo"so wa nao wa nga" jin kham cao" khyao re ta" mung: nga" dao: thang" re mho nae" tau: pe" tin" i"?.17 Mho" shid' ra" dao: re no: dao la lhaui" pye' mung: nga" dao: kheim: re naon- haung" thao" phaug' pye' venhaung i"?.18 Khug' mo; cang tau: re myao lao" yao: re o ngaui mung: su: myi: lhaid' ra" yaug we' zam" ra".19 Ni" nhaid' re qobo mae qhaug' pye' mung: ni" sho wa mhug' vhain" dao: za: ba: ta" ra".20 Nao wa zaung: jo, mung: mao: nhaung: qe re tug' shai" dao: ba: jhau: ra". Ni" myhi" yao: zo: re gaui mho ba: ra".21 Airu: nao kaid' ra" mau" re ngo sae za: na: na: ru yang ngo re: nao we' dau: ga: jho: na va" laug Ni" qobo re ngo ceim" shid' mung: ni" myo, qao: tae mae de: de: za: qhu" nae".22 Mo"so re to" myhid' ra" mo, we" ce: akhyo re myid: qu" na ge, wo". Airu: mangaid: re naonhaung" re khyaid' nae" su mana. Ngo naonhaung" re lao" caid' sin" khyo" pye' nae".23 Jeju caung: xeim: qhaug' byid' ra" yaug wa nga" myo, nho nga: lao: tau: yhe' na yaug ngaid: ra". Yao: cao" ye: nae" khyo dang re myid' ca: qu" ra" yaug re re: khyi: yu: ra" jeju re ngo qhu" na nae" ga: AsAng Mo"so mho: ra".