1 Nga" nhag' lam: khug mae nga: yu nae" dao: byang" sheim: jo; kyi: , Jhaung zug: pho" qhid' kheim: mae zhao: kyo" qhu" nae". Nga" sho re: ba jhao: ra" tung" su: mhaug' bag se: ngaid: ra".2 Nao wa byu myo: sho' mae je: yaung" lho" ra". Ni" nhaid' mae jeju dao: byang" jo; ra". Aimung: Mo"so wa AsAng re khonhae" re: min gam jhaung: byid' na: ra".3 Phung bao qam: o: qi" ra" AsAng we" khonhae" re: ham" hung: ngaid: ra" shae re vin: ci wa,.4 Dao: so: nhag' lam: nau" nhae" ru dang main" ra" mathao ni" phung bao ham" hung: re jui" ye" lo" wa,. Lo, yo lo, re: gyaug pho" ra" ja: re AsAng re qhu" li" nae".5 Ni" myo: khe' jham wa gyai ceim: ra". Ai jham wa gyevo qe: sang: kheim: mae thug' kyao" byid' ra". Byumyu" jham wa ni" khyid qao: mae lang" goe; gyo" veko".6 Mo"so we" ni" la kin wa thain" madaui ajo; jo; ra". Ni" mang: din" wa tarha" jo main: ra" khyo" dao: phyid' ra" mang: ngaid: ra".7 Nao wa dang main" rure o ngaui: mung: makhyang" ra" mo, re nghang: yaug ngaid: ra". Aimung: ni" zam" cao: qe: tho' mae ngaui bau: ngaui lho" ra" xau nao re je: gyain: byid' ra".8 Ni" mai bau: wa Mu: ra: sag' xau we' sheim nae pyo" ra" ja" yang ham" to" ra". Xao zaui qe, mae" tang" she mo, wa nao re caung: jhu" ko" ra".9 Mang: khao: ngo" mae" zomyi: jham wa ni" thao cao" mo, boe" lo ko" ra". Ni" lo, yo shaid' mae Ophira' qhaug' zai ve; shaung: ci mung: zaung: na: bam ko" ra".10 Zomyi: zo: we" gelho: myid: qu" mung: tae" gyo" xam" yu wa, Ni" amyu" we' ni" pho" yham dang: ug' khug' re to" myhid' pye' se,.11 Airu: lao" nao yaung" lho" rure jhaung zug: nhag' qu" dag: ngaid: re , yao: wa ni" AsAng ngaid mung: yao: re lam khug phug' myao: wa,.12 Turu' zomyi: zo: mae" dadu jo, nho" qo" ra" mo, re: jhaung qhu" ci: li" mung: ni" myo, nho nga: lao: re qho: li" genae".13 Jhaung zug' zomyi: zo: wa yham khug mae ham" hung: nga: lho" ra".Hhang: yang shaung yhaung" ra" mai bau: ve; ci mung:14 Za: pin: cug' yang myo, khung: nghoe' pye' mung: jhui" vhao" li" genae". Yao" vhao cao: zomyi: qere: jhaung zug: jhao" jhui" vhao" li" genae".15 Ngaui bau: zhao: yao: ru we' jhui" li" mung: jhaung zug' yham khyo qo" jhui" vao genae" ngaid: ra".16 Nga" jhaung zug: we" ni" phug' pho" qe: khu mae tha" nae" yaug gai zo: myo: sho' qo" mung: myid dagye, geim" mae nao yao: bam re zug: nhao: li" nae".17 Ngo wa ni" mang khyao: re byu ngug xe qae: mae myid: beim" na nhao nae". Byumyu" qe wa mug: myid aqae: qae: mae caung: khin" na vegeshao: wo".