1 Mo"so we" xe' we' sho: cid jham wa qid gyaung: re cu" na: ru we' dakhyo: nga" solo wa Mo"so mae myid: nghae" na: wo".2 Nga" solo wa Mo"so ga" ra" daui: na: ra" AsAng re moe, shab' na:. Khoyo, re Mo"so jhao" joe" nae" laug i"?.3 Ni" Mo"so wa khai: mae na: i"? ga: amyid' na ko" mathao mae nga" ngug byid wa nga" zo: nam ru: boe" na va".4 Ai: khyo re myid: beim: mung: ne, qug nga" nhag' lam: myid: kaug' ra". Khoru: ein: re ngo wa byu myo: sho' we' zam" khug zo" ngaui bau: caung: khin" ra" nghaui" thoe jham re nghaui" mung: poe vao mo, we' daga" yaug yo za: lhaung" bocao" ye: ye: kaid' na:.5 Nga" solo we" ngo pe" mung: nhag' ngai: na: i"?. Mo"so re myid: nghae" lao" na wa, ngo re khyaid' yu: ra" AsAng ngo lam khug: ra" Mo"so: jeju re ngo caung: khin" caung: nghaui" na nae" wo".6 Nga" solo wa nga" akhug mae sham sham mung: na: kyi:, khoru: ein: re , Yodain: qid yae Hermon: bam khyid Mizara bug gaung mae ngo AsAng re myid: beim" ra".7 Qid lhang" myang thoe we' qid sham" dalam: we' dalam: thug' li" mung: bang: lhung" yang ngo re nghoe' gam: lo: ava".8 Ai ngaid qere: Mo"so wa na" mae jeju byid' ra". Myi" mae yao" phung bao ham" hung: re caung: nghaui" zo" nga" AsAng re jhaung: xe: mho' yang: na nae".9 Ngo re pe" mung: to" myhid' na: i"?. Nga" gyevo: yang pyam" yhin" rure phau: mung: ngo wa nhag' kaug' ra" mai bau: re ve, yang: pe" ru: mung: gai: na zai i"? ein: nga" laung: mo" baui ngaid: ra" Mo"so re myid: va".10 Nga" gyevo jham wa ni" Mo"so khai: mae na: i"? ga: khyao za: ta" na ko" mung: nga" shoqug: jham re nag: khyug' mung: jung" khyoe' na ko" ra".11 Nga" solo we" nao wa pe" mung: nhag' ngai: na: i"?. Nga" akhug mae pe" mung: yaug mayo mung: na: i"? Mo"so re myid: nghae" zo" re" na: na wa, ngo re khyaid' yu: ra" AsAng: ngo lam khug goe; pa" ra" Mo"so: jeju re caung: khin" caung: nghaui" nae".