1 Mo"so we" lai: lo" va" ayo, abang: phug' pho" qe: ta mae kaid' lai: lo ra" mau" re yao: bam ta" kyo: ko" mung: ngonhaung" yao: qo" the' gyo" yu va".2 Taung bug qere ni" lo, lam" yang khe' thug' pye' mung: ngonhaung" phug' pho" qere jaung: khyo" to: byid: va". Taung bug: amyu" qere yhin" pyam" mung: phug' pho" qere na: je: nhao: ava".3 Yao: bam wa yao: yao" shae: yang ai: mug: myid re qo" zug: gam ko" ru mangaid: yao: bam: lo; yang khyaid' yu ko" ru mangaid: AsAng: lo, yo lo, we' ni" myo, nho bo" bao: yang yao: bam re khyaid' yu: ra".4 Mo"so we" AsAng wa nga" jhaung zug: ngaid: ra". Yaku' amyu" qe: khyaid' yu: khyo re nyhang" byid' ra".5 AsAng khyo" ngonhaung" gyevo qere tau: lhain" pye' veshao: wo". Gye kaid' ra" mo, re ni" mang khyo" qo" khe' thug' nae" kheim: so' qo" veshao: wo".6 Nga" la: re ngo malam nga" shae re: ngo re qo" khyaid' yu: ru mangaid:.7 AsAng za: ngonhaung" re gyevo: lo, mae" khyaid' lhoe' yu: ra". Ngo nhaung" re manug nhung mo, re re: qho' phau: nhao: ava".8 Ngonhaung" wa mathang mano: Mo"so mae bau" nghao" mung: yao" mang khyao: re za: caung: khin" na: bam va".9 Ngaid qere: AsAng wa ngonhaung" re shelhaui" pye' mung: qho' phau: nhao: ako". Ngonhaung" mo, thaui: we' re: daga" mabo: cao" ngaid: ra".10 Ngonhaung" re gyevo qe: qhid' kheim: mae" tao" phao nhao mung: ngo nhaung" re manug nhung: ra" mo, wa yao: bam o: khyo: lhaid' zo: lhaid' shaug' ko" ra".11 Se' nae" yaung: to" ra" yao re" ru: qhaug' byid' ke' mung: taung bug: mang: din" khyi" khao: ngo" khyo phyo' sin" pye' ava".12 Ni" byumyu" qe aphug' gau mayu lo: aung" pye' mung: , aung" ra" gau jho re: ni" jo, nho" myo" laug: lo: ru mangaid:.13 Ngonhaung" re yham kyo: cao: qe gaui mho jung" nae" tau: avai: ayae mae na mo, jung" khyoe' jao: ngonhaung" re boe" nhao va" ra".14 Getau: byumyu" qe ngonhaung" re dao: tau" tau" nae" we' su pe" yang au: lhang: nghoe" nae" nao ngo nhaung" re poe" va" ra".15 Jung" khyoe' ra" yaug we' nga: khyoe' ra" yaug: mathao mae tug' phaug' yaug we' loge, phaug' ba: ra" yaug: qhid' kheim: mae,16 Gye kaid' ra" yaug we' loge, phaug' ra" yaug: mathao mae re:,ngo wa ngo yao: qho' phau" ra" akhyo re ne, qug myid: beim" na: myo, qho' phau" ru: yang nghoe' gam: ru phau" na va".17 Ai re"ru: thaung" qhug' na ngaid qere: ngonhaung" AsAng re mato" myhid' , dao: so: rere: maphyo' qheim".18 Ngonhaung" nhag' myid naung zaid: mazaid: khyo" to" ra" tarha" mae" ma lai: lo: su" na va".19 AsAng kam" wa ngonhaung" re zag ne jham: na jao: mae ngonhaung" khyug' mhain" yhin" mung: shid: ra" bao qaung we' ngonhaung" re nghoe' gam: to: byid' ra".20 Ngonhaung" wa Mo"so: mang khyao: re to" myhid' pye' mung: getau: amyu" mo"so jhao" lo, qang: ye" ngaid: re kam" wa ,21 Nhag' lam: myid mae mho' ci: rure myao: kyao" ra" Mo"so ai re maca: qu" lo: na nae" i"?.22 Gaigai: yao: ni" mathao mae ne, qug se' pye' ru qhug' bam va". Se' nae" tau nyhang" jaung: to" ra" yao re" ru: ngo nhaung" re su pe" jho ko" ra".23 AsAng we" beim: gyang: wa, pe" mung: yab mo"myhid' na: i"? to" se,.24 Ngonhaung" phau" na: ra" deim: so: zag we' yhin" ko" rure maqu" mageim dakaid' byid: la, pe" mung: to"myhid' na: i"?.25 Ngonhaung" nhag' myid solo wa myid mae te' sho' deim" zag: maqhug' mung: qao gao re: myid gaung mae te' de; jo; ra".26 Ngonhaung" re bao" thaug' na: ra" Mo"so we" to" li" byid: la, nhag' myain" myid khyo" yang khyi: khyaid' lhoe' yu la, wo".