1 Masho: majhin: mo, re myid: beim" na: ra" yaug wa nga: lho" ra". AsAng wa ai: yaug re qug: qe" ra" ne, mae lhoe' yu: li" nae".2 Mo"so wa yao: re bao" thaug' ru we' myain yo jeju byid' ra" mathao mae mang: din" mae yaug yo za: qo" na: li" nae". Gyevo qe o: khyo: yao: re qhaug' pye' zai mangaid:.3 No phyo: qhug' na: au: Mo"so wa bao" thaug' yu: li" nae". No: na: au: AsAng wa yao" yab jao: tha" pye' byid' ra".4 Ngo wa Mo"so we" ngo re nhag' myain" yu la, nga" aung khug: nhag' myid re gai yo nhao la, khoru: ein: re nao re ngo gyai yao: zai" shaid' va" ein: mho' na nae".5 Nga" gyevo qe wa yao: wa shid mung: yao" mang khyao: khoyo, joe"sho' nab: byaug nae" i"? ga: ngo re nhung mung: ba: ta" ko" ra".6 Ngo re li" kam" qu" ra" yaug wa mhug' dao: za: ba: jhau: ra". Yao" nhag' myid mae re: magai: ra" tau" da re qaung" to" ru we' taung gaung khyo thug' lo" lao" ai re ta" hau" qin" ra".7 Ngo re manug: ra" mo, nga" akhyo re dao: so' jho" so' ko" ra". Nga" adao mae magai malho" ra" tau" yaung khyo za: akaid' ko" ra".8 Yao: mae magai: ra" ave, de; jo; ru mung: dalhang lhang lao" maqo" dam: to" lo: ngaid: ra" ga: mho: na ko" ra".9 Gai gai: yao: ngo re lam mung: nga" mug zo" ra" ba nam pho" lao" re: ngo re yao" khu nhag' thaung: thao: yang zab: thang" ra".10 Mo"so we" ngo yao: bam re loge, dam: qo" phaug' nae" tau: mae ngo re nhag' myain: yang: tau: to" yu shi: la,.11 Nga" gyevo qe ngo re magai: qo" aung lo" akhyo re qu" yang: AsAng wa ngo re nhag' qu" dag; na: rure ngo ba: ra".12 AsAng wa nga" nhag' lam: din" rure qu" yang: ngo re bao" thaug' yu mung: ni" qhid' kheim: mae malam: lai: nha: to" li" nae".13 Israel qe: AsAng Mo"so wa gyag maqui: thain" madaui byungug xe qae: mae nga: lho" na veshao: wo". Amen ngaid va" Amen.