1 Ngo wa AsAng re lha" zo" re" myid: lam: lao" na: nga" shaid' khyo lhang: phaug' lo mung: ngo mho' yao thoe re gyo: byid' ra".2 Yao: wa ngo re gyaug ci" jao: dung: gyain: we' nab: shid nae" tham: nheim: khug mae" xoe: yu mung: nga" khyid re laung: mo" baui dao mae kai" to: mung: nga" khu bye re ye; tang nhao: ra".3 Ngonhaung" Mo"so re caung: nghaui" nae" nghaui" thoe asag' re byid' to: va". Byu myo: sho' wa ai re the' myao mung: Mo"so re khug ngha: lo: li" genae".4 Ngaid beim" ra" mo, we' mhug' pyag' khyo dang: mae su" na mo; thao mabo: de, lo: Mo"so re lam khug: na: ra" yaug wa nga: lho" ra".5 Nga" AsAng Mo"so we" ngonhaung" tau: nao kaid' to" ra" mug' pho: we' juyi khyug' ra" mau" myo" laug: ra". Ni" qhid' kheim: mae matho' nghe' lo: sho' myo" laug: ra". Ai: akhyo re ngo ta" hau" kyo: nae" ein: re matho' ta" lo: sho'myo" laug: ra".6 AsAng wa xeim: dau: we' zo: shaug' xeim: re o nghaui: ru mangaid: mung: nga" no: khye' re nao phung" byid' ra". Phaid' ngaui" xeim: we' qobo khyaid' xeim: re mamho' ngaid: ra".7 Jham: dao: dang: mae ngo re hhang: yang tung" to" ru we' dakhyo: ngo wa cao" ye: nae" ein: khae: yu va".8 Nga" AsAng Mo"so we" nao o: khyo: cao" nae" ngo o ngaui: ra". Nga" nhag' lam: aung khug mae ni" tarha" bo: jo, gau ngaid: ra".9 Ngo wa volo mo, mo" phaung gaung: mae din main" akhyo ngaui bau: lau dao: re ta" hau" kyo: va". Nga" nhaid' re ngo pyid' to" ru mangaid: Mo"so we" nao yao: ba: na gau ngaid: ra".10 Ni" dang main" rure nga" aung khug: nhag' mae manyham" to: ni" dao: so: we' khyaid' yu: khyo re ngo ta" hau" kyo: va". Ai: volo phaung mo" gaung: mae ni" jeju we' dao: so: re ngo manyham" to: nae".11 Mo"so we" nga" adao mae ni" nhag' myain" myid re daqab; yu byid: la, nhag' khyag' ru we' dao: so: zaung: ru ngo mae khonhae" re: ato" to: byid: la,.12 Matho' nghe' lo" ra" qug: khai: ngo re lhang" gam" to: veko". Ngo maqo" tau: nghao" qu" lo: sho' nga" qobo ngo re myhi: lo va". Ai jham wa nga" au: dai: xae khe' tho' myo: laug mung: nga" nhag' lam: qam: nang" byaug va".13 Mo"so we" ngo re khyaid' yu nae" myid: beim" na wa, Mo"so we" ngo re bao" yu nae" tau: phyaid phyaid gyo" li" byid: la,.14 Nga" kao re se' nae" ga: qho mo, qho' phau: mung: myo, nho sham vegeshao:. Ngo re qug: khai: kyin" nhaung" qhug' nhao mo, naung zaid: zaid' lo" mung: myo, nho nga: lao: gyoe, vegeshao: wo".15 Ngo re he ... he... ga: ta" ra" mo, yao: bam kaid' ra" mau" mathao mae qho' phau: vegeshao: wo".16 AsAng re qho: ra" mo, alhab' kam" wa AsAng mae ngaui bau: nhag' dag; na geshao: wo". Khyaid' yu: khyo re kao bau: ra" mo, wa Mo"so re khonhae" re: qi" qhang gang" tang: na veshao: ga: ta" na vegeshao: wo".17 Ngo kam" wa myaung sho: moe, shab' ngaid qere: Mo"so ngo re beim" na: ra". AsAng wa ngo re bao" thaug' yaug ngo re khyaid' yu yaug ngaid: ra". Nga" AsAng Mo"so we" da aug' o" na lo:.