1 AsAng we" nhag' yo: yang: ngo re qobo dabyid: la, gyai nhag' gyid' ra" khyo" re: damho" shid' la,.2 Ni" myo: khe' nga" gaung mae zao" kyao" vao mung: ni" lo, lam" yang ngo re nhai" zag: lo" ra".3 Ni" nhag' yo" kheim: thoe: mathao: yang nga" gaung sho: qao" zin" ru mabo lo:. Qobo: mathao: yang nga" shoqug: sho qae jham re yaug yo: ru maqo" yu lo:.4 Ngo zai" shaid' ra" qobo wa nga" gaung re nghoe' pye' mung: la" ra" qo vin reru: ngo matho' vin lo: sho' la" byaug va".5 Ngo magai kaid' ra" mau" zo" mathao: yang no dae jham wa bab sheim nae mung: jaid: byi: myi" lo". na va".6 Ngo wa no: ra" dae khai" no mung: nhag' lam: nyham: khyo" yang: nhag' kaug' mai bau: ve; ci mung: daba: geim" su" nin" lhang: qin" na:.7 Nga" phyid' dam: wa laung: ra" mau byin: bo mung: gaung sho: re: qao" zin" khyo mabo: byaug lo:.8 Byain: ru we' gyo; no: ru ngo boe" na:. Nhag' lam: myid laug kaug' mung: zag: yao: hug' na:.9 Mo"so we" ngo o ngaui: ru alhab' wa ni" qhid' kheim: mae ngaid: ra". Ngo no kyang: kyang" na: au: re ba byid: la,.10 Nga" sang: kheim: laui" nin" na mung: qam: o: re: gain: byaug va". Myo, re: thab thab mung: byaug va".11 Nga" ba nam qe zam" cao: qe wa nga" no dae myao yang: va: mae ye, mung: qu" na ko" ra". Yham kyo: cao: qere: maqu" mageim jao" lai: lo" ako".12 Nga" kao so' re qho: ra" mo, wa lha" thaung: khae: to: ko" ra".Ngo qobo kaid' nae" akhyo re zhaug' qu" na mo, wa daba gyam nhung: ra" dao: za: jhau mung: mangaid makhung" ru za: kaid' nae" tau" yaung: ako".13 Ngo kam" wa no: jid yaug ru: pe" mathe' gyo: nhaid' maba: ho" ra" nhaid' jid yaug re" ru: na: na:.14 No: magyo: mung: madam: ba: tug' jhau yaug re" ru: boe" na:.15 Khoru: ein: re Mo"so we" ngo AsAng re myid: lam: lao" na: wo". Nga" AsAng Mo"so wa tau: byid' li" nae".16 Khoru: ein: re nga" khyid zab: jhaid' lang: lao" ngo tho' ze nug: ra" mo, nga" mathao mae ngaui bau" ru maqhug' genae" tau: ngo mho' na:.17 Ngo tha" thu: lang: nae" ru boe" na va". Ngo qug: khai: kaug' qhui nae" ru nga" myo, le, mae khonhae" re: amyao: na:.18 Nga" qobo re zhao: kyo" na: zai" shaid' nghung" ra" mathao mae nhag' lam: myid myo: myid laug: na:.19 Nga" gyevo qe kam" wa qao" zin" ru we' qam: mo" bo ko" ra". Ngo re mangaid' ru majo: ru mae nghang: mo, kam" wa gyai myo: ko" ra".20 Yao: bam wa agai re magai: ru yang tha" pye' ko" ra". Ngo wa gai: ra" khyo dang mae cao" na: ra" mathao yao: bam ngo we' vo, ae shai" boe" byaug: ra".21 Mo"so we" ngo re dashepye' to: co' la, nga" AsAng Mo"so we" ngo we' va: va: mae dana byid: la,.22 Ngo re khyaid' yu: ra" Mo"so we" ngo re bao" thaug' yu nae'' tau: phyaid phyaid gyo" li" byid: la,.