1 Mashab makhyang: mo; mathao mae nhag' lam: daqu" laung. Magai: ru kaid' ra" mo, re o: daqu" byid.2 Khoru: ga" re yao: bam wa myo, gae re yaid: pye' ru: qhug' mung: mhin: jham re" ru: jhoe' lo" li" genae".3 Mo"so mae khug ngha mung: gai: ra" khyo cao" na ge, Mang: din" mae na mung: dao: so: re cao" pyang" na ge,.4 Airu: cao" kaid' dang: na lao" nao o: ra" ru boe" dang: lo nae" akhang" re byid' li" nae".5 Yao: yao" akhyo Mo"so re qhaug' wa, yao: re lam khug wa, ai ru: lao" ja: khao: ngo" poe" byid' li" nae".6 Ni" dang main" ra" akhyo re bo" bao ru:, jo main: ra" khyo" kaid' ra" jham re na" gaung: ba bao re" ru: qhu" byid' li" nae".7 Mo"so: qhid' kheim: mae te' dai" za: na mung: yao: nyhang" kin byid: nae" rure lao" na wa,. Nhag' lam: kaui mung: zai" boe" ru we' magai: ra" khyo re aung myaug: na yaug: mathao mae nhag' lam: dalaung.8 Nhag' dayo: , ma daug myid dake' to:, nhag' lam: dalaung qobo za: azai" thug' nae".9 Myid: shaid' ra" mo, wa sham" khyo" pye' qhug' myao genae". Mo"so re myid: nghae" na mo, kam" wa mang: din" ma re qo" sang: yu: li" genae".10 Khomyhao" ma myao" re tarha" macao" ra" yaug mana: byaug lo: nae". Yao" na jao: re cao" qho qere: mathe' myao lo: nae".11 Nhag' lam: nyham: khyo" mo, kam" wa mang: din" ma re qo" sang: yu mung: yaug yo myain cae: taung" qhug' na: li" genae".12 Tarha" macao" ra" yaug wa dang main" ra" yaug re magai: ra" khyo" myid mung: yao: zaui bin" zag: kyag' ba: ra".13 Ngaid qere: AsAng wa yao" ba na ayo, akhin: ba mung: qu" qi: na: ra".14 Tarha" macao" ra" mo, re tha" lang: nhao nae" tau: dang main: khyo cao" ra" mo, re se' nae" tau: shae she: ru we' la: thaung: ci veko" ra".15 Ngaid qere: yao: bam: shae wa yao: bam: sang: kheim: mae zao" kyao" li" genae".Yao"bam: la: re: gyug' byaug genae".16 Dang main" ra" mo; dajhid' zo: za" jo, nho" wa makhyang" ra" yaug: jo, nho" myo: sho' tho' mae je: so' ha" qo" ra".17 Tarha" macao" ra" mo; lo, gyug' byaug nae" dang main" ra" mo, kam" Mo"so bao" thaug' yu: li" nae".18 Dang main" ra" mo; bana ayo, re malam: lai: gang" tang: jo; li" nae".19 Yao: bam qug: khai: qhug' ra" ayo, mae qho' maphau: mung: bao" khug' gyo" ra" bana ayo, mae la laug taung" qhug' zo: qhug' shaug' genae".20 Ma khyang" ra" mo, kam" wa byo; qeim: lo" li" genae". Mo"so re naung phaug' ra" mo, wa din" yo mae" bin: ru: sheim nae: baui" lo" mung: myi: khug' thaui: re" ru: baui" lo" byaug: li" nae".21 Makhyang: yaug wa jhid' shai qere: madam: xe' lo: za: na: pye' ra". Dang main" ra" yaug kam" wa nhag' myain" myid bo mung: dam: byid: ba: ra".22 Min gam jeju re qo" khae: yu: ra" yaug wa mang: din" re qo" sang: yu: li" nae". Nhang: kheim: phau" ra" yaug wa sham" lhaui" khyo" pye' ru qhug' nae".23 Byu gai qe: khyo dang re Mo"so nyhang" byid: mung: ai: yaug su" ye" lo" ra" khyo re yao: o ngaui: ra".24 Ai: yaug wa tha" thu: lang: qere: pye: byin yao: maboe". Khoru: ein: re Mo"so wa yao" lo, re zaui: byid' ra".25 Ngo zoqae: yo, mae" re ana" mao" lo" na va". Ngaid qere: dang main: yaug she: pye' to" ru qhug' mung: yao" zo: dau qe cao" mho' zo" qin" ko" ru re ma myao: qu" shi:.26 Yao: wa khonhae" re: nhag' myain" myid bo mung: jhid' shai byid: ba: ra". Yao" zo: myid: qe min gam jhaung: the' khae: yu ko" ra".27 Magai: rure jao" pye' mung: gai lho" ra" mau" re zaui: mung: ai ru: kaid' lao" na tang ye, tang: na nae".28 Mo"so wa tarha" vao: rure o ngaui: ra". Yao" shao lho" ra" mo, re she: pye' to: nae" mangaid:. Yao: bam wa pyaid da du na: na: li" genae". Tarha" macao" ra" zo: myid: qe kam" wa sham" lhaui" she: khyo" pye' ru29 qhug' li" genae". – Dang main" ra" mo, ai: mang: din" re qo" sang: yu mung: khonhae" re: mabaui mabyo, qo" na: na genae".30 Dang main" ra" yaug: nhaid' wa jeju dao: jhau: thug' li" ra". Yao" sho re: jo main: ra" dao: za: ata" ra".31 Mo"so: tarha" wa yao" nhag' lam: khug akao" vao: jo, mung: yao: su" ye" lo" qere: malang" be, ngaid: ra".32 Makhyang" ra" yaug wa dang main: yaug re kang: yang: yao: re se' nae" tau: cao" qho: na: ra".33 Ngaid qere: Mo"so wa ai: yaug; lo, mae" dang main" ra" yaug re ug: pye' nae" mangaid:. Tarha" pyam" ra" ba mae qobo myao byid: nae" mangaid:34 Mo"so re myid nghae" lao" na mung: yao" khyo mae su: wa, ai lao" ai: mang: din" re qo" sang nae" akhang" we' tau: yhe' to" ru qhug' nae". Tarha" macao" ra" yaug seim" lo" ru re nao the' myao: li" nae".35 Tarha" macao" ra" yaug wa yao: qaid: khyo: qo" zug: gam mung: yao" jo, qo mae yaug: qi" lo: ra" sag' yaung" gae ru: ngo myao ngaid qere:,36 Thao re yao: qhui" lin" lo" mung: byaug: lo" byaug: ra". Yao: re ngo qho ngaid qere: mathe' myao lo: ,37 Jab byang" ra" tarha" cao" pyang" wa, dang main" ra" tarha" re qu" kin: na wa,. Airu: kaid' na yaug wa lo" thao" mae yaug yo myain cae" ru qhug' nae".38 Shaid' nghung" ra" mo, alhab' wa byo, qeim: khyo joe" mung: makhyang: mo, re phyo' qheim" lhaui" pye' ru qhug' genae".39 Dang main" ra" mo, khyaid' yu: khyo re Mo"so nyhang" byid' na: ra". Qug: khai: kyin" nhaung" qhug' ra" ba yao: bam khug ngha jao: boe" byid' ra".40 Mo"so wa yao: bam re bao" thaug' khyi: yu: ra". Lam jang" khug ngha ko" ra" mathao mae tarha" macao" ra" mo; lo, mae" xoe: khyaid' yu: ra".