1 AsAng we" ngo re nghang" ra" mo, re nghang" pye' wa,. Ngo re gye kaid' ra" mo, re gye bokhain: bao" yu la,.2 Go we' shae ci mung: ngo re bao" yu nae" to" li" la,,3 Ngo re cao" khe' mo; khyo dang re lhae taid' yang tam" kyo" byid: la,. Ngo wa nao re myain yo nhao yaug ngaid: ein: nga" Solo re mho wa,.4 Nga" kao re qho mo, wa qho' phau: mung: myo, nho sham vegeshao:. Ngo re dae te' nae" myid: yaung: ra" mo, naung zaid: zaid' lo" mung: gyaug qho'byaug vegeshao:.5 Aibam wa la hug' yang cidao" ra" phaui: lhug ru: boe" vegeshao: wo".6 Yao: bam: khyo dang wa mug: caid' mung: jhaid' jo, shao: wo". Mo"so: logyo: qe re: yao: bam re cao" khe' vegeshao: wo".7 A khyo: majo: ru nga" tau: lha" thaung: khae veko". Pe" qobo re: mabo: ru nga" kao so' tau: mae dung: gyain: dau" to: veko" ra".8 Ai ru" mo, mabeim: maso: byo, qeim: khyo joe" vegeshao:. Yao: bam khae: to" ra" lha" mae yao: bam myi" vegeshao:. Yao: bam dau" to" dung: gyain: mae yao: bam gyo" geshao:.9 Ai ru: ngaid: re nga" Solo wa Mo"so mae ngha mung: ngaui bau" ru qhug' nae". Khyaid' yu: ra" khyo rere: ngha mung: nhag' lam: zhao: yao: ru qo" li" nae".10 Mo"so we" nao ru" ru khoyaug ngaid: ra" i"?. Aqug: aqae" qhug' ra" yaug re yao: tho' qam: je: bo yaug: lo, mae", Aqug: aqae" qhug' ru we' sho: jhin yaug re pyam" yhin" ra" yaug: lo, mae" nao she: yu: ava", nga" shoqug: shoqae alhab' wa ta" li" genae".11 Madang main" ra" sagso: jham bo: thug' li" mung: ngo pe" maba: ru ngo re yug: zhaug' ko" ra".12 Yao: bam wa agai re magai: ru: yang tug' xe' ko" ra". Aimung: ngo wa nhag' lam: thao" lo" byaug va".13 Ngo kam" wa yao: bam no phau" jid: mo" mai bau: ve; ci mung: zo: shaug' jao" yang: nhag' ngai: ru we' jhaung: mho' na:.14 Yao: bam re nga" ba nam , nga" mao: nhaung: ru: toe' mung: kaid' ra".Yao: myhi" re myid: beim: mung: kaug' qhui yaug ru: kaug' qhui mai bau: ve, yang: mug' mug' mung: su" qin" ra".15 Ngo tha" thu: lang" ra" au: yao: bam ngaui bau: mung: ham phaung ko" ra". Pe" khyag' mathaid' ra" mo, we' ngo maba mase" ra" mo, nga" qhid' kheim: mae ham phaung ko" ra". Mathang mano: ngo re ceim" lao" cin" ako".16 Poe mae cao" yeim: zo" qin" ra" byu vhang: qe we' daga" ngo re zaui kyag' kyag' ko" ra".17 Mo"so we" khomyhao" joe" sho' zhaug' qu" na nae" i"?. Nga" kao re yao: bam kaid' ra" qug: khai: mae" re: ngo jhid' de; thao" rure lo:tin: jham mae" re: khyaid' yu la,.18 Jeju qi: va" wo" ein: byu phaung mo" agaung: ngo khae: yu nae". Byu myo: sho' agaung: mae nao re caung: khin" nae".19 Majo ma ang: ra" khyo" ngo re gye kaid' ra" mo, aung myaug poe maqo" kaid' vegeshao:. Qobo maqo" ru ngo re manug: ra" mo, myo, jhin" maqo" qu" geshao:.20 Khoru: ein: re yao: bam wa no: gyo: yo: ra" dao: maba: jhau ko" ngaid: ra". Sae za: ana ko" mung: byu qe: adao mae anyham: avho' mau" re yaung: ako".21 Ngo re nhaid' cag' qhu" mung: he... he...ngonhaung" yao" myo, jid' yang myao va" ga: mho: ako".22 Mo"so we" AsAng wa ba: myao: kyao" ra". Sae za: dana: na lo:. Ngo we' va: va: mae dana byid: la,.23 Nga" Mo"so nga" AsAng we" ngo re tarha" dao: phyid' byid: la,. Ngo jhao" joe" ra" mau" re dao: phyid' byid: nae" khyo: ni" gaung re nhug' peim: mung: to" wa,.24 Nga" AsAng Mo"so we" Ni" dang main" ru yang nga" mau" re ca: qu" mung: kin byid: la,. Yao: bam ngo re aung va" ga: maqo" ngaui bau: geshao:25 Ngaid va" ngonhaung" o ngaui: khyo: ngaid va" ga: yang: yao: bam: nhag' khug mae na: to: geshao:. Ngonhaung" yao: re myug: pye' va" ga: maqo" ta" vegeshao:.26 Ngo qug: khai: qhug' ra" mathao ngaui bau: mo, qho' phau: mung: mug' hao" byaug geshao:. Nga" mathao mae yao: yao" gaung re nga: yu: ra" mo, qho' caid' gyaug caid' phau: mung: myo, nho sham vege- shao: wo".27 Nga" dang main" rure bojhid' de; ra" mo, kam" wa qi sam: su za: nghaui" thoe nghaui" mung: ngaui bau: vegeshao:. Yao" daui mung mo, pyo: nae" khyo nyhang" byid' ra" Mo"so wa qi: qhang gang" tang: na vegeshao:. Gai mung: yao: bam khonhae" re: ta" na vegeshao wo".28 Ngo re: AsAng: dang main" ra" akhyo re ta" hau: mung: malam: lai: AsAng re caung: khin" na nae".