1 Ngo wa AsAng re dapyaid: geim" caung: khin" min byid' na nae". Yao" phung bao qam: o: re khonhae" re: caung: khin" nghaui" na nae".2 Nga" solo wa Mo"so re khug ngha mung: bau" nghao" qin" na nae". Nyham: gyo" na: ra" mo, wa the' gyo: mung: ngaui bau: vegeshao:.3 Ngo we' daga" Mo"so re caung: khin" ge, wo". Yao" mang khyao: re ngo nhaung" ceim" nga: yhe' gelang:.4 Ngo Mo"so re qho mung: yao: ngo re tau: byid' ra". Qu" gyaug sho' ra" jao: mae" yao: ngo re khyi: khyaid' yu: ra".5 Mo"so re tau: nghao" qu" ke' ge, bo" bao re the' myao genae". Qho' gyaug jao: mae" re: qo" loe, genae".6 Ce: sho: jhin yaug hug' yao: thoe re Mo"so gyo: byid: mung: qug: khai: sho: jhin: ru alhab' khug mae" khyaid' lhoe' ke' ra".7 Mo"so re gyaug phug' ra" mo; avai: ayae lhang" gam: mae yao" mug: gaung: logyo: jham jo, qo yu mung: khyaid' yu ba: ako".8 Mo"so gai lho" ra" akhyo tau" lag; qu" mung: ba: yu ge, yao: mae khug ngha yaug wa nga: qo" ra".9 Mo"so: shaogyang" mo, we" Mo"so re gyaug phug' na ge, wo". Gyaug phug' ra" mo; adao mae ca" qo: ru pe" mabo lo:.10 Lo:tin: jham qug: khai: moe, shab' ko" qere: Mo"so re qho: ra" mo, mae gai: ra" ja: daja: lao" maca" lo: ko" ngaid: ra".11 Zoshao qe we" li" geri: , nga" dao: re tae" gyo: ge, wo". Mo"so re gyaug phug' nae" tarha" re ngo mho" shid' nae".12 Gai: ra" rure the' myao nae" tau: kao daui khyo we' daga" ba na ayo, akhin: re o ngaui myid: lao" na mo, kam" wa ,13 Ni" nhaid' sho re magai: ra" khyo mae" jao" pye' wa,. Nhaid' qid: yang re: mhug' dao: vhain" dao: dajhau.14 Magai: rure jao" pye' mung: gai: rure za: kaid' wa,. Su we' nyang vang" taung" qo" ba: na sho' cao" pyang" na wa,.15 Mo"so: myo, jid' wa dang main: mo, re qu" na: ra". Yao: bam mho' yao: thoe rere: tae" gyo: byid' ra".16 Makhyang" ra" mau" zo" kaid' mo, re kam" wa myid gaung: dao mae lhau" myid: beim: nae" akhyo majo, lo: sho' sham" khyo" pye' nae" tau: Mo"so myo, tau" tau" na: ra".17 Dang main: mo, zag: yao thoe re Mo"so gyo: byid' ra". Qug: khai: kyi" khyag' alhab' mae" re: yao: bam re khyaid' yu: ra".18 Mo"so wa gyug' main" ra" nhag' myid bo mo, we' Solo mae myid: ngai: na mo, we' jhao" na: ra". Naung myid qo" mung: nhag' lam: nyham: khyo" ra" mo, re khyaid' yu: ra".19 Dang main: yaug: qug: khai: myo: sho' thaung" qhug' na ngaid qere: Mo"so yao: re qug: khai: alhab' mae" lhoe' yu: ra".20 Yao" shoqug: shoqae alhab' re yao: qu" byid' na mung: dakhe' lao" gyug' ru thaung" qhug' nae" mangaid:.21 Makhyang" ra" mo, kam" wa qobo dae: yang kao so' seim" byaug: ru mae joe" genae". Dang main" ra" yaug re manug mung: ra" yaug wa qobo dae byid' ru qhug' nae".22 Mo"so wa yao" daui mung mo; kao so' khyaid' yu: ra". AsAng mae khug ngha yaug khag' re: pyam" yhin" ru phau: nae" mangaid:.