1 Qobo re lhoe' byid' ru we' qobo re nyham" pye' byid' ru qhug' ra" mo, nga: lho" ko" ra".2 Mo"so qobo vhin nae" ru mae" loe, mung: mhug' sham" nhag' myid mabo mo, wa nga: lho" ko" ra".3 Ngo wa nga" qobo re mata" kyo: lo: na: na: au: dane; geim" ngug: kaug' ru: yang nga" shoqug: shoqae jham qeim" zae" lo" khyo joe" ra".4 Ni" lo, wa myi" na" nga" au: dao mae la: mung: nga" bau kyoe: wa zin vao kheim: mae" kyaug' ho: re" ru: boe" byaug va".5 Ngo wa ngo yao" qobo re AsAng: qhid' kheim: mae mho' bain" ra". Zai" shaid' nghung" ra" qobo re ma nyham" to: ngo lhoe" shaid' ra" qobo Mo"so re ci: qhu" mho' bain: nae" ein: myid: na: au: AsAng wa ngo shaid' nghung" ra" qobo re lhoe' ke' venhaung.6 Airu: mung: AsAng re the' myao nae" ayo, akhin: mae shaogyang" mo, alhab' wa ni" qhid' kheim: mae mho' vao: lo: li" genae". Gai gai: yao: qid je" au: wa yao: bam jhao" joe" nae" mangaid:.7 AsAng wa nga"khug ngha jao: ngaid: ra" ngo re qug: khai: mathaung" qhug' nae" tau: gug: gam byid' ra". Aung doe, nghaui" thoe yang ngo re lhang:" kham" to: nhao ra".8 Nao re ngo mho" shid nae". Nao ye" lo" nae" khyo dang re ceim" shid' nae". Nao re qu" gam caung: na nae". Juyi mabo: ra" myao: ru: daboe".9 Ngo nao jhao" mate' li" ru mung: nhaid' kho' ke' mung: nhoshoe" taui" yang she ca" ra".10 Makhyang: mashab yaug wa qug; khai: mo" phau" ra". Mo"so re khug ngha: na: ra" yaug kam" wa nhag' myain"ru lhang" gam" to" ra".11 Dang main" ra" mo, we" Mo"so mae ngaui bau: ngaui lho" qisam: su caung: khin" na ge,. Nhag' lam: din" ra" mo, nhag' dag taung" caung: khin" na ge, wo".