1 Dang main" ra" mo, we" AsAng re caung: khin" na ge, Nhag' lam: shao lho" ra" mo; caung: nghaui" thoe wa gai lho"ra".2 Tang: be, mung: Mo"so re caung: nghaui" ge, wo". Tang: khyang daxe khe' de; ra" tang: we' Mo"so re caung: nghaui" ge,.3 AsAng: qhid' kheim: nghaui" thoe asag' yang caung: byid: ge,. Labo" maid: ru we' gyo" pyo" ra" tang: she: myhang" kyo: ge,.4 Pe" mung: ein: re Mo"so: mung dao: wa dang main" ra" Yao" lo, mau" zo" alhab' geim" re: lam: lang" ra".5 Dang main" ru we' din" ra" tarha" re yao: o ngaui: ra". Mug: myid gye, geim" mae Mo"so: jeju byang" jo; ra".6 Mo"so: mung dao" yang mug: gaung boe" lo va". Yao" nhaid' mae" she: thug' ke' ra" so' yang mug: gaung ba kyi lho" mo" jham re phain" ke' ra".7 Qid dae mo" mae" qid re dazhain za: lao" zhang: qhain" to: mung: no; thao" ra" qid dae rere: gug' ra" jo, qo mae qaung" to" ra".8 Myidkin dagye, geim" Mo"so re gyaug phug' na vegeshao:. Myidkin byu alhab' re: phug' myao" na vegeshao: wo".9 Pe"mung: ein: re Mo"so ta" ke' ru alhab' boe" lo: ra". Yao: pin: to" ru we' dakhyo: yao" dao: gang" tang: ra".10 Mo"so wa taung bug amyu" qe byin qham: lo rure ha: pye' ra". Yao: bam myid: yaung tau" da rere: phyo' pye' byid' ra".11 Mo"so juyi khyug' tau" da ru wa gyag maqhui: gang" tang: jo; ra".12 Mo"so re lam khug goe; pa" ra" amyu" wa nga: lho" ra". Yao" tau: khyin: yu qhug' ra" amyu" qe re: nga: ye; ako".13 Mo"so wa mug: gaung mae" qu" na mung: byu xaosu alhab' geim" re the' myao: na: ra".14 Yao: zaung: na: ra" jo, qo mae" qu" ke' mung: mug: myid xaosu byu qe re xam" to" ra".15 Yao: bam: nhag' myid alhab' re phain" to: byid: mung: yao: bam: mau" zo" alhab' geim" re qu" kin byid' ra".16 Jhaung zug: wa yao" gye khe' sulhe: qam: o" yang qo" loe, nae" mangaid. Sulhe: pho" re: yao" qam: o" yang qo" loe, nae" mangaid:.17 Gye khe' myao: re: qug: khai: loe, sho' maqo" kaid'. Qi" thao" ra" qam: o: khyo" yang re: maqo" khyaid' yu ngaid: ra".18 Mo"so re gyaug phug' ra" mo, we' yao" nhag' myain" ra" jeju re lao" na mo, alhab' dao mae19 Yao: bam: nhag' myid re shid nae" jao: mae" khyi: yu: ru we' bao" khug' thaung" qhug' ra" ba na mae" lhoe' yu nae" ga: yao". myo, jid' zhaug' qu" na: ra".20 Ngo nhaung" nhag' lam: solo wa Mo"so re myid: nghae" ru we' na: bam:. Mo"so wa ngonhaung" re bao" thaug' na yaug ngon- haung" re gug: gam: na yaug ngaid: ra".21 Shaogyang" ra" mang khyao: mae khug ngha: ra" mathao mae ngonhaung" wa Mo"so mae ngaui bau: yaug yo: na:.22 Mo"so we" ngonhaung" wa nao mae khug ngha: na: ru we' dakhyo: ngonhaung" adao mae ni" nhag' myain" ra" jeju wa agang" tang: jo, na veshao: wo".