1 Mo"so we" AsAng mae ngo khug ngha: na: wo". Gyaug qho' ga" ru ngo we' va" lin: na shao:. Ni" dang main" ru: yang ngo re khyaid' yu la,.2 Ngo shaid' khyo no: khae khae mung: phyaid phyaid li" khyaid' yu la,. AsAng wa ngo khug ngha: ra" laung: mo" baui , ngo khug ngha jao: zho: cang yham ngaid: ra".3 Gai gai: yao: ngo khug ngha: ra" laung: mo" baui nga" zho: cang yham kam" wa AsAng yao: ngaid: ava". Ni" mang khyao: mae ngo re jhui" yu mung: mho" shid' kyang" na la,.4 AsAng wa nga" khug ngha jao: ngaid: ra". Ai mung: ngo re khae: to" ra" lha" mae" lhoe' she: yu la,.5 Dao: so: zaung: ra" nga" AsAng Mo"so we" AsAng wa ngo re khyaid' yu mung: nga" solo re ni" lo, mae qhaug' ke' ra".6 Aseim akeim mae cao" na: ra" mo, re ngo ma nug: qu". Mo"so re lam jang" khug ngha: na nae".7 AsAng wa ngo qug: khai" rure myao byid: mung: nga" solo thaung" qhug' ra" akhyo re ba: myao: xam" ci: ra" mathao mae jeju so' ha" mung: ngaui bau: caung: nghaui" na nae".8 Ngo re gyevo qe: lo, khyo ma qhaug' pye' lo: jao: dae lu: ra" jo, qo mae ye; tang nhao ra".9 Mo"so we" ngo qug: khai: thaung" qhug' na va". Ngo re nhag' myain" yu la, ngo wa myid: myaung" ngau" ru: yang nga" myo, jid' kyam: byaug: kyi: va".10 Ngo wa nhag' kaug' nhag' ngai: ru: yang qam: o: gain: byaug va". Saung" ngug yang: nga" kao lang" byaug va". Ngo wa qug: khai: qhug' mung: qam: nang" byaug: ru we' shoqug: shoqae jham lao" re: qeim" zae" lo" na va".11 Yham kyo: cao: qe ngo re manug ma khyaid' kaid' ako". Ba se" mo, re: qu" ca' pye' ako". Taung gaung mae ngo re the' myao: re jao" phao: lo" ko" ra".12 Mamyid: beim: lo" ra" shid mo, re" ru: ngo re to" myhid' pye' veko". Ug' go, je; ru: ngo boe" na va".13 Su pe" jung" khyoe' ra" dao: ngo the' gyo: mung: avai: ayae mae gyaug pho: za: ngaid: ra". Byu qe wa mo, khain mung: ngo re se' nae" ga: ham veko" ra".14 Ngo wa AsAng mae khug ngha: na: wo". AsAng wa nga" Mo"so ngaid: ra" ein: mho' yao: na:.15 Nga" ayo, akhin: we' kao so' wa ni" lo, mae ngaid: ra". Gyevo qe we' pyam" yhin" ra" mo; lo, mae" ngo re khyaid' yu la,.16 Ni" myo, nho nga: lho" na veshao: ni" nhag' myain" ra" myid we' ngo re khyaid' lhoe' yu la,.17 Mo"so we" ngo AsAng re mho' yao: na mung: qho' phau: nae" ma ngaid:. Tarha" macao" mo, kam" wa qho' phau: mung: movo: mug: mae sae za: na: na veshao:.18 Ngaid beim" ru maphug' makhyaid' ru we' daga" dang main" ra" mo, re jung" khyoe' dao: ta" mung: mhug' vhain" dao: za: jhau: ra" mo; nhaid' wa sae za: tae" lo" li" nae".19 AsAng re gyaug phug' ra" mo; tau: qaung" to" ra" jeju wa khoqhi" qi" ra" i"?. Byu qe: qhid' kheim: mae nao re khug ngha: na: ra" mo; tau: mau" jhaung qhu" wa la laug taung" ngaid: ra".20 Byu qe mhug' sham" ra" jao: mae" maphao shao: ga: ai: yaug re gug' ra" jo, qo mae nyham" to" ra". Su pe" yug: no qobo mae" ni" seim zaung: yang gug: gam: yu: ra".21 Mo"so wa nga: lho" na veshao: wo". Gang" tang: ra" vogaung: mo" rere: mug' pho" jhid' de; myid yao: ngo re qhu" byid' ava".22 Ngo wa AsAng: qhid' kheim: mae ngo maqo" vao lo: nhaung ein: nhag' ngai yang: ta" va". Ngaid qere: nao re mho' yao: re ngo mho' ra" dao: re tae" gyo: byid' ra".23 Mo"so: shaogyang" mo, we" Mo"so re jhid' kao ge, wo". Mo"so wa dao: so: zaung: ra" mo, re qu" gam caung: na: ra". Ngaid beim: nghao" mo, re kam" wa qobo dae qi: sho' byid' ra".24 Mo"so re khug ngha: ra" mo, we" qam: yu yang: vae" ra" nhag' myid bo ge, wo".