1 Mo"so wa nga" bo" bao , ngo re khyaid' yu: ra" AsAng ngaid: ra". Ngo khoyaug re ba: gyaug nae" i"?. Mo"so wa nga" kao so' khug ngha jao: ngaid: ra". Ngo khoyaug re din: gyaug ca" nae" i"?.2 Nga" sho: re zo: nae" ga: makhyang: mo, li" lo ko" au: khyid tha" thu mung: lang" aveko".3 Gye mo, thaui: mo" nga" qhid' au: mae ham: bam ko" qere: pe" sang: manin". Mang: byo, lao baui: lo ngaid qere: pe" dao" manghae" ai mae nga" nhag' lam: zang: zaug: na nae".4 Gai: thao" ra" abao" athaug' ngo Mo"so re jhaung: mho' va". Ngo daui: na: ra" dalo: gyo: mae Mo"so: yham mae qhug' na mung: Mo"so: shao lho" ra" khyo re myao nae" we' yao" yham mau" myid: ngha: na nae" rure ngo o ngaui: ra".5 Khoru: ein: re qug: khai: qhug' ra" ba yao" seim zaung wa ngo re gug: gam: yu nae". Gug' ra" pa" caung: qe, khug mae ngo re nyham" to: mung: laung: mo" baui dao mae ngo re yhe' to" li" nae".6 Ana" lao" nga" avai: ayae mae na ko" ra" gyevo qe: adao mae nga" au: re tau: to' byid' ava". Aimung: pa" jhaung: yham mae labo" maid: ru daga" xeim: ngaui" byid: nae". Nghaui" caung: nae". Mo"so re caung: khin" caung: nghaui" na nae".7 Mo"so we" ngo mho' yao thoe re gyo: byid: la, ngo re nhag' myain" ru we' tau: byid: la,.8 Nga" myo, nho nga: lao: re qho se, ga" amyin" dao: mathao Mo"so we" ni" myo, nho nga: lao: re ngo qho: na nae".9 Ni" myo, khung: ngo mae" dalhang: phaug' lo" , nhag' yo: yang: re: ni" jeim ngo re dato" pye' ngo re bao" thaug' na: rure: AsAng ngaid: ra". Ngo re khyaid' khyi: yu: ra" Mo"so we" ngo re dashe pye' la, ngo re za: danha: to: la,.10 Nga" myhi" pho" qe ngo re shelhaui" to: ko" qere: Mo"so ngo re vo; jhui" yu: li" nae".11 Mo"so we" ni" khyo dang ngo re qhu" byid: la, ngo re kung" ra" mo; mathao mae din" ra" gau: khyo" ngo re jhui" lo" la,.12 Madang main: ra" sagso: kham ko" mo, we' yhin" pyam" nae" tau: qam: phin" na mo , nga" qhid' kheim: mae to" ye; li" ko" mathao gyevo qe o ngaui: khyo mae ngo re da qhaug' byid' pye'.13 Gai gai: kao daui: na mo; jo, qo mae Mo"so: jeju re ngo the' myao nae" ein: myid: lam" ru bo: na:.14 Mo"so re myid: nghae" na wa, qam: yu yang: qag: ra" nhag' myid bo wa, Mo"so re myid: nghae" lao" na wa,.