1 Mo"so we" AsAng re myid: nghae" na: wo".2 Nga" Mo"so we" AsAng mae ngo khug ngha: na mung: qho' gyaug khyo majoe" veshao: nga" gyevo qe ngo re qo" aung genae" mangaid:.3 Gai gai: yao: Mo"so re myid: nghae" na mo, qho' phau: genae" mangaid:.4 Nhag' lam: kaui: ra" mo, qho' phau" li" genae".5 AsAng we" ni" khyo dang ngo re ceim" shid' mung: mho" kyang" yu la,. Pe" mung: ein: re AsAng wa ngo re khyaid' yu: ra" Mo"so , AsAng re khonhae" re: myid: nghae" na: wo".6 Mo"so we" ni" nhag' myain" ru we' ni" jeju re beim: wa, Ai jham wa geco' getoe: mae" jo, gau ngaid: ra".7 Ngo ve, qae" yo, mae shaid' ra" qobo re daxam" to: byid: la, gai lho" ru ngaid mung: nhag' myain: nhag' khyag' myid khyo" ngo re beim: la,.8 Mo"so wa gai: ra" nhag' myid dang byang" ra" myid bo mung: qobo qo" ra" mo, re khyo shid' au: she: ra".9 Nhag' lam: nyham: khyo" mo, re khyo gai khyo jhui" ngaug: yu: ra". Nhag' lam: nyham: khyo" mo, re yao" akhyo mho" shid' ra".10 Mo"so: dao: thang" we' sagso: dao: cao" ra" mo; tau: mae nhag' myain: nhag' khyag' ru we' jhaug' zaug: ru ngaid: ra".11 Mo"so we" ngo mae yug: no qobo myo" laug: jo; ru mung: dao: so: re myid: beim: yang: AsAng: mang khyao: re tau mung: nga" qobo khyaid' pye' byid: la,.12 Mo"so re gyaug phug' mo, re yao: bam cao" ye: nae" khyo dang agai re ceim" shid' li" nae".13 Ai: yaug wa myain yo qo" na mung: yao" zo: myid: qe wa mang: din" re qo" sang: li" genae".14 Mo"so wa yao" mho dao: gyo" ra" mo; ba nam ngaid: ra". Aimung: yao: bam we' to" ra" dao: thang" re ba se" nae" akhang" byid' ra".15 Ngo wa ayo, akhin: khao: ngo" Mo"so re myid: nghae" na: , Pe" mung: ein: re yao: wa nga" khyid re kyam: mae" lhoe' yu byid' ra".16 Ngo dayaug za: na: dang mung: nyham: khyo" ru qhug' na:. Ngo shaid' khyo lhang: phaug' lo mung: nhag' khyag' yu la,.17 Ngo nhag' ngai: na: rure nhag' tang" byid: mung: ngo re qug: khai: kyin" nhaung" mae" khyaid' lhoe' yu la,.18 Ngo nyham: khyo" ru we' nhag' ngai: rure myao byid: mung: nga" yug: no qobo alhab' re khyaid' lhoe' byid: la,.19 Nga" gyevo jham myo" laug: ru we' ngo re nhag' gyid' ru we' ma nug makhyaid' kaid' na ko" rure myid: qu" byid: la,.20 Nga" kaoso' re gug: gam mung: ngo re khyaid' yu la,. Ngo wa AsAng mae khug ngha: na mung: qho' phau" ru ngo maqhug' shao:.21 Ngo wa AsAng re myid: nghae" beim" na mung: nhag' lam: phyu: ru we' dang main" ru wa ngo re gug: gam: yu: ra".22 Mo"so we" Israel amyu" re qug: khai: kyin" nhaung" alhab' mae" khyaid' yu byid: la,.