1 AsAng we" ngo wa dang main" ra" khyo" cao" na mung: nga" shaid' mae dao: phyid' byid: la, Mo"so re lam khug: na: ru mung: ngo getau qo" nyham: gyo" lo" nae" mangaid:.2 Mo"so we" ngo re ca: qu" mung: lag: qu" wa,. Nhag' lam: sang: , kheim , noce' jham re cid' shao byid: la,.3 Ni" jeju nga" qhid' kheim: mae ajo; na mung: ni" dao: so: re ngo phug' myao: cao" pyang" na nae".4 Pe" khyag' mathaid' ra" byu we' ngo mazam", geim kaid' pyag' vhain" ba mo; phaung mae ngo mavao.5 Makhyang: mashab mo; ham phaung re ngo nghang" ra". Nhag' lam: kaui mo, we' daga" ngo mazam" zaung.6 Nga" lo, re ngo dang main" ru: yang cid' shao: pye' mung: Mo"so re caung: thoe: yang caung: khin" nae".7 Mo"so: mug' pho" mau" re qo" hau" kyo: sho' ni" xeim: ngaui" phain nhae mae na: na nae".8 Mo"so we" ni" yham we' yham qo re re: , phung bao myhao" byid' ra" jo, qo rere: ngo myid: ngaui: ra".9 Yug: no qobo de; ra" mo, we' daga" nga" solo rere: , Byu: kao re se' ra" mo, we' daga" nga" kao so' re dalhaung" to: byid: la,.10 Yao: bam: lo, wa mangaid makhung" ru bo ko" mung: lo, yo lo, wa khug vag: yu zo: ko" ra".11 Ngo kam" wa nga" nhag' myid shao lho" ru we' su" na:. Ngo re khyaid' yu mung: nhag' myain" yu la,.12 Ngo wa dau: ra" jo, qo mae ye; na mung: Mo"so re caung: khin" caung: nghaui" na nae".