1 Nga" Mo"so we", nga" Mo"so we" ngo re pe" mung: she: pye' to" i"?. Ngo mho' yao: ra" thoe wa ngo re bao" yu nae" yaug we' va" byaug: ra".2 Nga" Mo"so we" na" ayo, mae nao re yao ngaid qere: matae" gyo: byid: ngaid: ra". Myi" ayo, mae yao: ke' ngaid qere: yaug yo: ru maqo" ngaid: ra".3 AsAng wa Israel qe caung: khin" nae" la kin mae zaung mung: shaogyang" ra" yaug ngaid: ra".4 Nga" phug' pho" qe wa AsAng re lam khug: lo veko". Lam khug: ko" yang re: AsAng wa khyaid' yu: ava".5 Yao: bam wa AsAng re hug' yao ko" mung: khyaid' yu: khyo qhug' veko".6 Ngo kam" wa byu mangaid: bathaung za: angaid:. Byu qe jung" khyoe' gaui mho shao" pyao nae" su za: angaid:.7 Ngo re the' myao mo, alhab' wa qi: jung" ru , nhaid' cag' qhu" , au: nghoe" nghoe" qhu" kaid' ko" ra".8 Yao: wa Mo"so re lam khug mung: AsAng wa yao: re lhoe' yu veshao:. Yao: mae o ngaui: khyo bo: re ana" yao: jao" khyaid' yu veshao: ga: mho ko" ra".9 Ngaid qere: AsAng wa ngo re nga" myhi" aung mae" she: thug' yu mung: nug' nau" ayo, mae ngo re gug: gam byid' ra".10 Ngo wa nga" myhi" aung" mae" gyo" we' AsAng: lo, khug mae ngaid va". Myhi" aung mae" yao: AsAng wa nga" Mo"so ngaid va".11 Ngo we' va" lin: ru mae dana byid: la, qug: khai: qhug' nae" joe" li" na va". Bao" thaug' yu nae" su mana.12 Nung: jaung lo: myo: sho' ngo re lhang" gam: veko". Qam: bo: ra" Bashain: nung: jaung lo: jham re: avai: ayae lhang" gam" ci veko".13 Bin" thin zo: nae" ga: kyid' na: ra" lo:tin: re" ru: yao: bam ngo re myug nae" ga: nhaid' ho" ci veko" ra".14 Ngo wa qid ru: vhe' khyo" ru qhug' na: ra".Nga" shoqug: qhoe" jham alhab' shai" lo" byaug va". Nga" nhag' myid wa byo: min" ru: aqang: boe" lo" byaug va".15 Nga" qam: o: wa ug' cug' re"ru: ho: lo" byaug va". Nga" sho re: o mae de; lo" byaug va". Shid: ra" phaui: lhug bam mae ngo re to" to: veko".16 Makhyang: mo, daphung: ngo re li" lhang" kham" ci mung: lakha: jham re"ru: ngo re ceim" kham" lhang" to: veko". Nga" khyid lo, jham re thug' kyao" veko".17 Nga" shoqug: shoqae jham re ngo qo" nghe' qu" va". Yao: bam ngo re zhaug' qu" mung: qam: qo" ko" ra".18 Nga" mai bau: re pha" khyo" mung: yao: bam yao: cao: jho" gae: pye' ko" ra".19 Mo"so we" ngo we' va: va: mae dana. Nga" qam: o" yang ngo re bao" thaug' yu nae" tau: hin hin gyo" li" ri:.20 Nga" kao so' re shae mae" re: , lakha: jham: lo, mae" re: khyaid' yu la,.21 Lo: tin: nhaid' mae" ngo re khyaid' yu mung: dam: bug: khyug gyo: mae" ngo mho' yao thoe re tae" gyo: byid: la,.22 Ngo wa nga" mao: nhaung: qere lau dao: lo" kyo: nae". Mo, mo" phaung gaung: mae" Mo"so re caung: khin" nae".23 Mo"so re gyaug phug' ra" mo, we" caung: khin" ge, wo". Yaku' amyu" zo: qe alhab' mo, we" yao" jeju re qu" ge, Israel amyu" qe we" Mo"so re gyaug phug' na ge, wo".24 Khoru: ga" re , qug: khai" ra" yaug: qug: khai: re yao: pe" shui manho kaid' nae" mangaid:. Yao: jhao" mae" yao" myo, khung: lhang: phaug' lo nae" mangaid:. Yao: re mho' yao: re yao: tae" gyo: byid' li" nae".25 Ngo wa volo phaung gaung: mae AsAng re khin" mung: AsAng re phug' myao: mo; qhid' kheim: dao: so: to" ru we' dakhyo: zaui: so: nae".26 Nyham: khyo" mo, la laug taung" the' zo" li" genae". Mo"so re qho mo, qo" the' caung: khin" li" genae". Naonhaung" nhag' myid qam: pyang" byid' ru qhug' na genae".27 Mug: myid gye, gam: sho' mae" mo, beim: gyang" li" mung: Mo"so jhao" lhang: phaug' lo: li" genae". Byumyu" cao jab aboe: alhab' AsAng: qhid' kheim: mae goe; pa" genae".28 Mo"so ug gam nae" kheim: so' qo" ra". Byumyu" cao jab: jhaung zug: ngaid: ra".29 Myidgye, dao mae na: gai mo, zo: shaug' yang: pa" caung" li" genae". Phaui: lhug bam mae vao mung: yao: yao" kao re maqo" gug: gam mo, alhab' bam: re yao" qhid' kheim: mae goe; gam" ca" genae".30 Yao" zo: myid: qe AsAng re caung da" genae". Thao phyao: byu ngug xe qae: ai: AsAng: akhyo re hau" nhao" na: li" genae".31 Makhau: li" shi" ra" byumyu" qere AsAng wa yao" byu qere khyaid' yu: ra" ga: ta" kyo" li" genae".