1 Mug: gaung wa Mo"so: phung qab bao re bao: qhu" na: ra". Mug: nyug lasung" wa yao" lo, mau" zo" re qhu" byid' ra".2 Daba we' daba phyo mho" dao: kyo" na: ra". Damyi we' damyi ba jhao se" ru re qu" byid' na: ra".3 Nhaid' ta" dao: kheim: majo, yao: bam: nhaid' dao: thoe mathe' gyo: qere: ,4 Yao: bam: thoe wa myidkin gye, geim" khyo joe" gyo" lo" mung: yao" nhaid' dao: thoe wa mug: myid athao" joe" sho' hau" joe" lo" veko".5 Mug: gaung mae" ba mo" khye' te' to: mung: Ba mo" khye' wa yab qe, mae" thug' li" ra". Pho" sag' ru: ngaid mung: qam: bo: tao: mai qhi" yaug re" ru: jhu" nghao" thug' li" ra".6 Mug: gaung dashaid' thao khyo" thug' li" mung: dashaid' thao joe" sho' su" myhi: lo" ra". Pe" ja: re: yao" laung: nga" ru mae" loe; ru majo, ngaid: ra".7 Mo"so: tarha" wa jab byang" ru mung: nhag' lam: solo re qo" byao: nyhang" byid' ra" Mo"so: sagso: wa din" ru mung: nhag' magyang: mo, re nhag' gyang" lo nhao: ra".8 Mo"so: cao" khyao wa dang main: mung: nhag' lam: myid re myain yo nhao: ra". Mo"so: khang" dao: wa shaogyang" ru mung: myo, jid' re gyang" lho" nhao: ra".9 Mo"so re gyaug phug' ra" nhag' myid wa shaogyang" mung: malam: lai: gang" tang: ra" Mo"so khyo" to" ra" jin kham wa dao: so: we' daru: za: dau nyang: ra".10 Ai jham wa , hhang we' hhang agyang" tho' o ngaui gai: ra". Byo: yhid tho' je: cug: ra".11 Ni" jeim pho" re: ai: mathao mae myid: beim: myid: so: gyang" li" mung: ai: tarha" re cao" yang: so' ha" mo" qo" ra".12 Yao: yao: shaid' nghung" ru re khoy- aug ba: the' myao nae" i"?. Maba mabeim: shaid' nghung" ra" yug: no qobo we' ngo re shao: khyaid' yu la,.13 Qobo re vae" vae" za: mathe' kaid' shaid' nae" tau: tam" kyo" byid: la,.Yug: no qobo: yang ngo re ma-ug: gam veshao:. Airu" ra" khyo" yang ngo re dang main" ru qhug' mung: qi: sho' shaid' nghung: nae" mae" loe; li" nae".14 Nga" laung: mo" baui we' ngo re khyaid' yu: ra" yaug AsAng Mo"so we" nga" nhaid' dao: thoe we' myid: yaung tau" da: ra" akhyo jham wa AsAng: qhid' kheim: mae nhag' dag taung" ngaid veshao: wo".